بيىلعى جىلدىڭ 17 قاڭتارىندا قر پرەمەر-ءمينيسترىنىڭ ءبىرىنشى ورىنباسارى اسقار مامين ءباا ۆيتسە-پرەمەرى مەن ءباا پرەزيدەنتى ىستەرى جونىندەگى ءمينيسترى شەيح مانسۋر بەن زايد ال ناحايانمەن كەلىسسوزدەر جۇرگىزدى. بۇل تۋرالى ۇكىمەتتىڭ رەسمي سايتى حابارلادى.

كەلىسسوزدەر بارىسىندا قر پرەزيدەنتى نۇرسۇلتان نازارباەۆتىڭ ءباا-گە 15-16 قاڭتارداعى رەسمي ساپارى بارىسىندا قول جەتكىزىلگەن، جوعارعى دەڭگەيدەگى ۋاعدالاستىقتارىن ءىس جۇزىنە اسىرۋ جولدارى قاراستىرىلدى.

تاراپتار ەنەرگەتيكا، مۇنايحيميا، اتوم ونەركاسىبى، كولىك جانە لوگيستيكا، اسكەري-تەحنيكالىق سالالارداعى ورتاق جوبالاردى دامىتۋعا دايىن ەكەندەرىن راستادى.

«بايتەرەك» حولدينگى مەن «Mubadala Development Company PJSC» قازاقستان اۋماعى مەن وزگە كورشى ەلدەردىڭ باسىم نارىقتارىنداعى ينفراقۇرىلىمدىق جانە وزگە دە جوبالاردى بىرلەسىپ قارجىلاندىرۋ ءۇشىن جاقىن ارادا ءوزارا ينۆەستيتسيالىق پلاتفورما قۇرۋعا كەلىستى.

قر مەن ءباا-ءنىڭ ەنەرگەتيكا مينيسترلىكتەرى قر-دا مۇنايگازحيميا كەشەنى قۇرىلىسىنىڭ جوباسىنا تاراپتاردىڭ قاتىسۋ مۇمكىندىگىن تالقىلادى.

«قازاقستان تەمىر جولى» ۇلتتىق كومپانياسى مەن «Etihad Rail» ۇلتتىق تەمىرجول كومپانياسى ءباا مەن ءۇشىنشى ەلدەردە بىرلەسكەن ينفراقۇرىلىمدىق جوبالاردى جۇزەگە اسىرۋ ماسەلەلەرىن تالقىلادى.

ءباا اتوم ەنەرگياسى جونىندەگى كورپوراتسياسى «قازاتومونەركاسىپ» ۇاك»-مەن يادرولىق ەنەرگيانى بەيبىت تۇردە پايدالانۋ سالاسىندا ەكىجاقتى قارىم-قاتىناستى دامىتۋعا نيەت ءبىلدىردى.

امىرلىك تارابى قازاقستان رەسپۋبليكاسى قارۋلى كۇشتەرى اسكەري وقۋ-جاتتىعۋ ورتالىقتارىنىڭ ينفراقۇرىلىم نىساندارىن ينۆەستيتسيالاۋ ماسەلەسىن قاراستىرۋعا مۇددەلىلىك تانىتتى.

امىرلىك تاراپىنان كەلىسسوزدەرگە ەنەرگەتيكا ءمينيسترى سۋحەيل مۋحاممەد ال-مازرۋي، ابۋ-دابي اتقارۋشى كەڭەسىنىڭ مۇشەسى، «مۋبادالا دەۆەلوپمەنت» كومپانياسىنىڭ باس اتقارۋشى ديرەكتورى، ءباا اتوم ەنەرگياسى جونىندەگى كورپوراتسياسىنىڭ باسقارما باسشىسى حالدۋن حاليفا ال-مۋباراك، ابۋ-دابي قالاسىنىڭ مەرى، «Etihad Rail» ۇلتتىق تەمىرجول كومپانياسى ديرەكتورلار كەڭەسىنىڭ توراعاسى، ينجەنەر اۋد مۋرشيد ال-مۋرۋر، قاۋىپسىزدىك پەن قورعانىس ماسەلەلەرى جونىندەگى سىرتقى ىستەر ءمينيسترىنىڭ ورىنباسارى فاريس ال-مازرۋي جانە قر-داعى ءباا ەلشىسى مۋحاممەد ال-دجابەر قاتىستى.

كەزدەسۋگە قازاقستاندىق تاراپتان ەنەرگەتيكا ءمينيسترى ق. بوزىمباەۆ، قورعانىس جانە اەروعارىش ونەركاسىبى ءمينيسترى ب. اتامقۇلوۆ، «قازاقستان تەمىر جولى» ۇك» اق باسقارما توراعاسى ق. الپىسباەۆ، «بايتەرەك» ۇبح» اق باسقارما توراعاسى ە. دوساەۆ، «قازاتومونەركاسىپ» ۇاك» اق باسقارما توراعاسى ا. جۇماعاليەۆ جانە ءباا-دەگى قازاقستان ەلشىسى ق. لاما شاريف قاتىستى.

"The Qazaq Times"