بۇۇ: بانگلادەشتىڭ بوسقىندار لاگەرىنە گۋمانيتارلىق كومەك قاجەت

بۇۇ بانگلادەشتىڭ روحيندجا مۇسىلماندارىنا پانا بولىپ وتىرعان بوسقىندار لاگەرىنە شۇعىل گۋمانيتارلىق كومەك قاجەت ەكەنىن حابارلادى. ميانماداعى قانتوگىستەن باس ساۋعالاپ كەلگەن 436 مىڭ مۇسىلمان وتە اۋىر جاعدايدا قالىپ وتىر. بۇل تۋرالى APF اقپاراتتىق اگەنتتىگى جازدى. 

بۇۇ-نىڭ بوسقىندارعا جاۋاپتى قىزمەتكەرى فيلليپپو گراندي مۇسىلماندارعا تاماق، العاشقى مەديتسينالىق كومەك، تازا اۋىز سۋ، باسپانا، كيىم سىندى بارلىق قاجەتتىلىكتەرىن قامتاماسىز ەتەتىن زاتتار كەرەك ەكەنىن ايتادى. "جەرگىلىكتى حالىق تاراپىنان وتە ۇلكەن كومەك بولدى، ەندىگى كەزەكتە حالىقارالىق قولداۋ شاراسىن ۇيىمداستىرۋ كەرەك", -دەدى ول.

بىرنەشە كۇننەن بەرى بانگلادەشكە كەلگەن بوسقىنداردىڭ بيومەتريكالىق دەرەكتەرىن قاعازعا ءتۇسىرىپ، ولاردى تىركەۋ جۇمىستارى ءجۇرىپ جاتىر. فيلليپپو گراندي قازىر ميانمادان اعىلعان بوسقىنداردىڭ سانى ازايعانىن، بىراق الداعى ۋاقىتتا تاعى قانشا ادام لاگەردەگىلەردىڭ قاتارىنا قوسىلاتىنىن بولجاۋ قيىن ەكەنىن ايتادى. ول سونداي-اق، شەكارادا روحيندجالىق مۇسىلمانداردى تىركەپ، ولارعا "بوسقىن" ستاتۋسىن بەرۋ قىزمەتىن وڭتايلى ۇيىمداستىرۋ كەرەكتىگىن العا تارتتى.

روحيندجا مۇسىلماندارى ءوز وتاندارىنا ورالعىسى كەلەتىنىن جاسىرمايدى. بانگلادەشتىڭ قاۋىپسىزدىك قىزمەتى دە بوسقىنداردىڭ بيرماعا قايتقانىن قالايتىندىقتارىن ايتادى. بانگلادەشتىڭ جاعالاۋىندا بوسقىنداردان بولەك، 700 مىڭعا جۋىق روحيندجالىق مۇسىلمان مەكەندەيدى. ولاردىڭ كوبىنىڭ قۇجاتى بولماعاندىقتان، بۇل ەلدە "زاڭسىز ميگرانتتار" سانالادى.

ميانما بيلىگىنىڭ وكىلى اۋس سان سۋ چجي وتكەن اپتادا بيرمادان قونىس اۋدارعان مۇسىلماندارعا ورالۋعا رۇقسات بەرىلەتىنىن ايتقان بولاتىن. كۇنى كەشە UNISEF ەۋروپادان جولدانعان سۋ تازارتاتىن ءدارى، سانيتارلىق زاتتار مەن وزگە دە قاجەتتىلىكتەردەن تۇراتىن 100 توننالىق كومەك بانگلادەشكە جەتكىزىلگەنىن حابارلادى.

“The Qazaq Times”