فوتو: Reuters

يندونەزياداعى بالي ارالىنىڭ اگۋنگ جانارتاۋىنىڭ اتقىلاۋ قاۋپى تىركەلدى. زەرتتەۋشىلەر جەر استى تولقۋلارى تىركەلگەنىن جانە ماگما (قويمالجىڭ ىستىق سۇيىقتىق) جانارتاۋ كراتەرىنىڭ بەتىنە كوتەرىلىپ كەلە جاتقانىن ايتادى. بۇل تۋرالى BBس اقپاراتتىق اگەنتتىگى جازدى. 

قازىردىڭ وزىندە جانارتاۋعا جاقىن اۋماقتا تۇراتىن 10 مىڭعا جۋىق ادام وزگە جەرلەرگە ورنالاستىرىلدى. جەرگىلىكتى تۇرعىندار مەن تۋريستەرگە جانارتاۋعا 9 كم-دەن ارى جاقىنداۋعا تىيىم سالىندى. 1963 جىلى جانارتاۋدىڭ ويانعان كەزىندە 1 مىڭ ادام قازا تاپقان بولاتىن.

جانارتاۋدىڭ بولۋ ىقتيمالدىلىعى تۋرالى جورامالدار 1963 جىلعى اپاتتى جاعدايدىڭ بەلگىلەرىنە قاراپ جاسالعان. جانارتاۋعا جاقىن ماڭدى مەكەندەيتىن ءبىر تۇرعىن جەر استى تولقۋلارىنىڭ سانى جيىلەپ كەتكەنىنەن قاۋىپتەنىپ، بالالارىن الىپ، ۋاقىتشا قۇرىلعان لاگەرگە تۇراقتاعانىن ايتادى. جانارتاۋ اتقىلاۋى مۇمكىن ەكەنىن ايعاقتايتىن تاعى ءبىر بەلگى - كراتەردەن ۇشاتىن ۋلى گازدى ءتۇتىن.

قازىر ءباليدىڭ دەنپاسار اۋەجايى قالىپتى جاعدايدا جۇمىس ىستەپ جاتىر. بىراق يندونەزيانىڭ سىرتقى ىستەر مينيسترلىگى تۋريستەرگە جانارتاۋ اتقىلاعان جاعدايدا اۋە تاسىمال قىزمەتى توقتالۋى جانە رەيستەر كەيىنگە شەگەرىلۋى مۇمكىن ەكەنىن ەسكەرتەدى.

يندونەزيادا قازىر 130-عا جۋىق بەلسەندى جانارتاۋلار بار. بۇل ونىڭ تىنىق مۇحيتىنداعى جانارتاۋ اتقىلاۋى  مەن جەر سىلكىنىسىنە بەيىم "وت ساقيناسى" ايماعىندا ورنالاسۋىنا بايلانىستى.

“The Qazaq Times”