فوتو: APF/REUTERS

ءفيلليپيننىڭ پرەزيدەنتى رودريگو دۋتەرتە ءوزىنىڭ 42 جاستاعى ۇلى پاولو دۋتەرتەگە تاعىلعان "ەسىرتكى ساۋداسىنا قاتىسى بار" دەگەن ايىپتار راستالسا، ۇلىن ولتىرگەن پوليتسيا قىزمەتكەرىن جازاعا تارتپايتىنىن حابارلادى. بۇل - مەملەكەت باسشىسىنىڭ سوڭعى ءبىر جىلدا  ەسىرتكىمەن بايلانىسى بار دەگەن كۇدىكتىلەرگە قارسى جاريالاعان جاپپاي جازالاۋ شاراسىنا نارازىلىق بىلدىرگەندەرگە بەرگەن جاۋابى. بۇل تۋرالى APF جانە BBC اقپاراتتىق اگەنتتىكتەرى جازدى. 

پوليتسيانىڭ رەسمي دەرەكتەرىنە سۇيەنسەك، وتكەن جىلدىڭ ورتاسىندا باستالعان ناشاعا قارسى وپەراتسيالاردىڭ ناتيجەسىندە  3 مىڭ 800 ادام قازا تاپقان. قاۋىپسىزدىك قىزمەتكەرلەرىنىڭ تۇسىندىرۋىنشە، ولاردىڭ بارلىعى - قولعا ءتۇسىرۋ بارىسىندا قارسىلىق بىلدىرگەندەر. رودريگو دۋتەرتە ءوز سوزىندە پوليتسيانىڭ زاڭ بۇزۋشىلىقتارعا جول بەرۋىنە قارسى ەكەنىن، دەگەنمەن ولارعا وزدەرىن قورعاۋ بارىسىندا وپەراتسيا كەزىندە قارۋ قولدانعان نە باسقا ارەكەت ارقىلى كۇش كورسەتكەن ازاماتتاردى سوتسىز وقيعا ورنىندا ولتىرۋگە رۇقسات بەرەتىنىن ءجيى ايتىپ كەلەدى. APF اقپاراتتىق اگەنتتىگى رەسمي دەرەكتەن بولەك، اتالعان وپەراتسيالاردىڭ اتىن جامىلىپ، مىڭداعان ادامدار تۇسىنىكسىز جاعدايلاردا ءولىم قۇشقانىن جازدى.

رودريگو دۋتەرتە: "ەگەر مەنىڭ بالالارىمنىڭ ءبىرى ناشامەن بايلانىسسا، حالىق مەنى ءوز بالاسىنا كەلگەندە جاناشىرلىق تانىتتى دەگەن ويعا قالماۋى ءۇشىن، ونى بىردەن ولتىرەر ەدىم. مەن پاولوعا "ەسىرتكىمەن ۇستالساڭ، سەنى ولتىرەمىن ءارى سەنىڭ ءومىرىڭدى قيعان پوليتسيا قىزمەتكەرىن سوتتان قورعاپ قالامىن", - دەپ ەسكەرتتىم".

وسى ايدىڭ باسىندا پاولو دۋتەرتە سەناتتىڭ الدىندا ءوزىنىڭ قىتايدان فيلليپينگە تەڭىز جولى ارقىلى ەسىرتكى تاسىمالداعانى جونىندەگى ايىپتىڭ نەگىزسىز ەكەنىن ايتىپ، وپپوزيتسيا وكىلى تاققان كىنانى موينىنا الۋدان باس تارتقان بولاتىن.

“The Qazaq Times”