فوتو: الماتى قالاسى اكىمدىگى

قازاقستان پرەزيدەنتى نۇرسۇلتان نازارباەۆ الماتى قالاسىنداعى جۇمىس ساپارى بارىسىندا جاياۋ جۇرگىنشىلەرگە ىڭعايلانىپ قايدا جوندەلگەن جىبەك جولى، پانفيلوۆ كوشەلەرىن جانە «استانا» الاڭىن ارالاپ كوردى، دەپ حابارلايدى اقوردانىڭ رەسمي سايتى. 

مەملەكەت باسشىسىنا الماتى قالاسىنىڭ تۇرعىندارى مەن قوناقتارى ءۇشىن جايلىلىقتى ارتتىرۋ ماقساتىمەن جۇرگىزىلگەن اۋقىمدى قايتا جوندەۋ جۇمىستارىنىڭ باستى ناتيجەلەرى تانىستىرىلدى.

سونداي-اق، نۇرسۇلتان نازارباەۆقا قالانى اباتتاندىرۋ، جاياۋ جۇرگىنشىلەر مەن جول قوزعالىسىنداعى كولىك جۇرگىزۋشىلەردىڭ قاۋىپسىزدىگىن قامتاماسىز ەتۋدىڭ تيىمدىلىگىنە باعىتتالعان زاماناۋي شەشىمدەر جونىندە ايتىلدى.

ايتا كەتەيىك، الماتى قالاسىندا وسى جىلدىڭ كوكتەمىنەن بەرى جولداردى قايتا جوندەۋ، ابااتتاندىرۋ جۇمىستارى ءجۇرىپ جاتىر. ءبىراز كوشەلەرگە وزگەرىستەر ەنىپ، ۆەلوجولدار سالىندى. جاقىندا جاياۋ جۇرگىنشىگە باسىمدىق بەرۋ ءۇشىن قايتا جاسالعان «استانا» الاڭى اشىلعان بولاتىن. جاياۋ جۇرگىنشىلەرگە باسىمدىق بەرۋ ءۇشىن كابانباي باتىر، پانفيلوۆ، جىبەك جولى جانە گوگول كوشەلەرىندەگى جۇمىستار ودان ءارى جالعاسۋدا.

“The Qazaq Times”