ميانما ارمياسىنان قىرعىنشىلىققا ۇشىراعان روحيندجا مۇسىلماندارى. فوتو: Free Malaysia Today.

بۇۇ قاۋىپسىزدىك كەڭەسىندە ميانماداعى روحيندجا مۇسىلماندارىنىڭ ءىسى تالقىعا سالىندى. بۇل تالقى قاۋىپسىزدىك كەڭەسىنىڭ جابىق وتىرىسىندا تالقىلاندى. حالىقارالىق قاۋىمداستىق كەزەكتى ميانما ماسەلەسىن تالقى جيىنىندا  9 جىلدان كەيىن كوتەرىپ وتىر.  بۇل تۋرالى «تۇرىك تەلە-راديو» قىزمەتىنىڭ رەسمي سايتى جازدى.

ميانماداعى روحيندجا مۇسىلماندارىنا قارسى اسكەري كۇش قولدانۋ ءىسى جونىندەگى قاۋىپسىزدىك كەڭەسىنىڭ كەزەكتى وتىرىسىن ەفيوپيانىڭ تۇراقتى وكىلى تەكەدا الەمۋ باسقارىپ اشتى. جينالىستا ميانما قارۋلى كۇشتەرىنىڭ مۇسىلماندارعا باعىتتالعان كۇش قولدانۋ ارەكەتى ايىپتالدى. ءارى كەڭەس مۇشەلەرى ءبىر اۋىزدان اسكەري كۇش قولدانۋدى بىردەن توقتاتۋدى تالاپ ەتتى. سونىمەن بىرگە الەم ەلدەرىنەن روحيندجا مۇسىلماندارىنا بەرىلەتىن گۋمانيتارلىق كومەكتى قابىلداۋى كەرەك دەگەن شەشىم شىعاردى.

بۇۇ باس حاتشىسى انتونيۋ گۋتەررەش پەن ۇلىبريتانيا وكىلى دە اشىق پىكىر ءبىلدىرىپ، اسكەرلەردىڭ قارۋسىز بۇقاراعا جاساعان قىرعىنشىلىعىن ايىپتادى. ءارى، ميانما ۇكىمەتىنە وڭىردەگى جاعدايدى تەز ارادا رەتكە سالۋىن تالاپ ەتتى.

“The Qazaq Times”