ورتەنگەن جاتاقحانانىڭ ەكى ساعاتتىڭ الدىنداعى جاعدايى. فوتو: UzReport.news.

مالايزيانىڭ ورتالىق قالاسى كۋالا لۋمپۋرداعى ءدىني مەكتەپتەردىڭ بىرىندە ءورت بولىپ، وقۋشىلار مەن وقىتۋشىلاردى قامتىعان 24 ادامنىڭ ءومىرىن جالمادى. بۇل مالايزيادا سوڭعى 20 جىلدا بولىپ كورمەگەن ءورت اپاتى دەپ باعالاندى. بۇل تۋرالى BBC-ءدىڭ ونلاين قىزمەتى حابارلادى.

ءورت تۋرالى حابار بەيسەنبىنىڭ تاڭىندا، ساعات 05:40 مينۋت شاماسىندا مالىمدەلگەن. مەكتەپ جاتاقحاناسىنىڭ تەرەزەلەرى تۇگەلدەي تەمىر تورلارمەن بەكىتىلگەندىكتەن وقۋشىلار مەن مۇعالىمدەر قاشىپ شىعا الماعان.

پوليتسيا تاراۋلارىنىڭ بەرگەن مالىمەتىنە سۇيەنسەك قازا بولعانداردىڭ ىشىندە 2 وقىتۋشى بار، قالعانى دەرلىك 13 پەن 17 جاس ارالىعىنداعى ۇل بالا بولعان. ءورت قۇرباندارىنىڭ دەنەسى تولىقتاي كۇيىپ كەتكەن.

ەلدىڭ پرەمەر-ءمينيسترى نادجيپ رازاك Twitter پاراقشاسىندا اپاتتان قازا بولعانداردىڭ تۋىس-تۋعاندارىنا كوڭىل ايتىپ سابىرعا شاقىردى. ءورتتىڭ سەبەبى ءالى دە تەكسەرىلۋدە. ازىرگە پوليتسەيلەر ءورتتىڭ جاتاقحانا بولمەلەرىنىڭ بىرىنەن شىققانى تۋرالى مالىمدەدى.

“The Qazaq Times”