ماتيدى ءورت جالمادى. فوتو: BBC.

گرەكيا ۇكىمەتى تاراتقان سوڭعى مالىمەتتە، افيناعا جاقىن ماڭدا بولعان ءورت اپاتىنان كەمىندە 50 ادام قازا بولعانى ايتىلدى. ەل بيلىگى ءتىلسىز جاۋدان بولعان بۇنداي اپاتتى سوڭعى ون جىلدان بەرىگى ەڭ ۇلكەن ءورت اپاتى دەپ باعالادى.

گرەكياداعى ءورت جاعدايى تۋرالى مالىمەت بەرگەن BBC تىلشىلەرى، اپات وشاعىنا اينالعان ماتي اتتى تەڭىز جاعالاۋىنداعى ەلدى مەكەننەن 26 ادامنىڭ سۇيەگى تابىلعانىن جازدى. افينادان 40 شاقىرىم قاشىقتىقتاعى ماتيدەن جالپى 40 ادامنىڭ كوز جۇمعانى راستالىپ وتىر.

ۇكىمەت باسشىسى الدىن الا جوسپارلانعان شەتەلدەگى رەسمي ساپارىن كۇشىنەن قالدىرعان. توتەنشە جاعدايلار دەپارتامەنتى مەن قارۋلى كۇشتەر دە ءورتتى تىزگىندەپ، ماتي تۇرعىندارىن قۇتقارۋعا كىرىسكەن. ءورت سوندىرۋگە تىكۇشاق، اسكەري جانە ارناۋلى قايىقتاردا جۇمىلدىرىلۋدا.

ورتتەن 16 بالانى قامتىعان 104 كىسى جاراقات العان. اراسىندا 11 ادامنىڭ جاراقاتى اۋىر. دەنساۋلىق ساقتاۋ تارابى جارالىلار اراسىنان ءولىم-ءجىتىم سانى كوبەيۋى مۇمكىن ەكەنىن جاسىرمايدى.

الداعى ۋاقىتتا گرەكيا جەرىندە اۋا تەمپەراتۋراسى جالعاسى جوعارىلايتىنى بولجانۋدا. ءورتتى تەز ارادا تىزگىندەۋ ءۇشىن فرانتسيا، پولشا جانە يتاليا ەلدەرى دە كومەك قولىن سوزۋدا.

“The Qazaq Times”