كۇردتەر يراكتان تاۋەلسىزدىك سۇراپ وتىر

يراكتاعى كۇردىستان اۆتونومياسىنىڭ پرەزيدەنتى ماسۋد بارزاني "باعداد تاۋەلسىزدىك الۋعا بايلانىستى رەفەرەندۋم وتكىزۋگە قولداۋ بىلدىرمەسە، بولاشاق دەربەس مەملەكەتتىك شەكارالارىن بەلگىلەيتىنىن" ەسكەرتتى. بۇل تۋرالى BBس اقپاراتتىق اگەنتتىگى جازدى. 

يراكتاعى كۇردىستان اۆتونومياسىنىڭ پرەزيدەنتى ماسۋد بارزاني وسى ماسەلەگە قاتىستى ورتالىق بيلىكپەن كەلىسىمگە كەلۋدى قالايتىنىن جەتكىزدى. ال يراك ۇكىمەتى رەفەرەندۋم وتكىزۋ ەل كونستيتۋتسياسىنا قايشى ەكەنىن العا تارتىپ، تاۋەلسىزدىك تۋرالى باستاماعا تۇبەگەيلى قارسىلىق ءبىلدىرىپ وتىر.

ماسۋد بارزاني، سونداي-اق كيركۋك قالاسىن اسكەري كۇشپەن العىسى كەلگەن كەز كەلگەن قارسىلاسقا قارسى ايانباي كۇرەسەتىندەرىن جەتكىزدى. كيركۋك - يراك پەن ونىڭ اۆتونومياسى اراسىنداعى داۋلى، مۇنايعا باي وڭىرلەردىڭ ءبىرى. كۇرد اسكەرلەرى بۇل ايماقتى "يسلام مەملەكەتى" لاڭكەستىك ۇيىمىنىڭ باسىپ الۋىنا توسقاۋىل بولىپ، ءوز قاراماعىنا العان. ەگەر كۇرد اۆتونومياسى تاۋەلسىزدىك الىپ، كيركۋكتى ءوزى بەلگىلەگەن تەرريتورياعا قوسىپ السا، يراك كۇنىنە 1 ملن باررەلگە دەيىن قارا التىن بەرەتىن ستراتەگيالىق ماڭىزدى اۋماقتان ايىرىلىپ قالادى. سوندىقتان شيت اسكەري كۇشتەرى كيركۋكتى كۇردتەرگە بەرمەۋگە بەل بايلاپ وتىر.

يراكتاعى 37 ميلليون حالىقتىڭ 15-20 پايىزىن قۇرايتىن كۇردتەر مەملەكەت ىشىندەگى ەڭ ءىرى ءتورت ەتنيكالىق توپتىڭ ءبىرى. 1991 جىلى اۆتونوميا العان كۇردتەر يراكتىقتاردان ىرگەسىن ءبىرجولا اۋلاق سالۋعا العاشقى قادامىن 25 قىركۇيەكتە ءۇش اۋداندا بەلگىلەنگەن رەفەرەندۋمنان باستاماق.

كۇرد اۆتونومياسىنىڭ پرەزيدەنتى ۇلىبريتانيا مەن اقش-تىڭ "يراك "يسلام مەملەكەتى" لاڭكەستىك ۇيىمىنا قارسى كۇرەسىپ جاتقان كەزدە، اۆتونوميا سۇراۋدىڭ تاۋەكەلى جوعارى" دەگەن ەسكەرتپەسىن نازارعا المادى. ماسۋد بارزاني ءوزىنىڭ بۇل ارەكەتىن بىلاي ءتۇسىندىردى: "بەيبىتشىلىكتى جوعالتىپ الۋعا قورقاتىنداي، يراكتا قاشان تىنىشتىق بولىپ ەدى؟ ءبىز ونىڭ تۇتاستىعىنا نۇقسان كەلتىرەتىندەي، يراك ەشقاشان بىرلىگى جاراسقان مەملەكەت بولعان ەمەس".

كۇرد اۆتونومياسىنىڭ باسشىسى ەندىگى بار تاڭداۋدى حالىققا قالدىراتىنىن حابارلادى. ەگەر ولار رەفەرەندۋمدا، "جوق" دەپ، قارسىلىق بىلدىرسە، كوپشىلىكتىڭ ويىنا قۇرمەتپەن قاراۋعا ۋادە ەتكەن بارزاني ۇسىنىس ءبىراۋىزدان ماقۇلدانعان جاعدايدا، بىردەن تاۋەلسىزدىك دەكلاراتسياسىن جاريالاۋعا اسىقپايتىنىن ايتتى. بارلىق ماسەلەنى ورتالىق بيلىكپەن تالقىلاۋعا نيەت ءبىلدىرىپ وتىرعان كۇردتىك ساياساتكەر"رەفەرەندۋم كۇرد حالقىنىڭ ءوز بولاشاعىن انىقتاۋداعى العاشقى قادامى " دەپ ەسەپتەيدى.

“The Qazaq Times”