استانادا زاڭسىز قىزمەت ەتەتىن تاكسيلەرگە ايىپپۇل سالىنادى

استانادا زاڭسىز قىزمەت ەتەتىن تاكسيلەر جويىلماق. ول ءۇشىن جەرگىلىكتى بيلىك وكىلدەرى تەكسەرۋ جۇرگىزگەلى وتىر. وسىلايشا قالا تەحنيكالىق، مەديتسينالىق تەكسەرىستەن وتپەگەن، جولاۋشى قاۋىپسىزدىگىنە جاۋاپ بەرمەيتىن تاكسي قىزمەتىنەن تازارتىلماق، دەپ حابارلايدى استانا تەلەارناسى.

تەلەارنانىڭ مالىمەتىنشە، قازىر قالادا 14 تاكسوموتورلى كومپانيا بار. ياعني 500 كولىك قىزمەت ەتەدى. سوڭعى 3-4 جىلدا مۇنداي 20 شاقتى كومپانيا جۇمىسىن توقتاتقان. ويتكەنى، زاڭسىز قىزمەت كورسەتەتىندەر كوپ بولعاندىقتان، توقىراپ قالعان.

ەندى قالا اكىمدىگى قالا يميدجىنە نۇقسان كەلتىرمەي، جولاۋشىلار قاۋىپسىزدىگىن قامتاماسىز ەتپەك. قىركۇيەكتىڭ 12-سىنەن باستاپ 1 اي بويى زاڭسىز تاكسي قىزمەتىن اتقاراتىنداردى تەكسەرۋ باستالادى. جولاۋشى تاسۋعا قۇجاتى جوق كولىك جۇرگىزۋشىلەرى 20 ايلىق ەسەپتىك كورسەتكىشكە دەيىن ايىپپۇل تولەيتىن بولادى. ول 45 مىڭ تەڭگەدەن جوعارى.

"ازىرگە اكىمدىك وكىلدەرى زاڭسىز تاكسي قىزمەتىن اتقارىپ جۇرگەندەردى ۇستايتىن بولادى. ال الداعى ۋاقىتتا قول بۇلعاعاندارعا تۇرا قالىپ، جولاۋشىنى دىتتەگەن جەرىنە جەتكىزەتىن كولىك يەلەرى دە جاۋاپقا تارتىلماق. بىراق ماماندار ولاردى قاشان، قالاي ۇستايتىندارى تالقىلاماق.  ءموبيلدى قوسىمشا ارقىلى قىزمەت ەتەتىندەر دە تەكسەرىلۋى مۇمكىن", - دەيدى «استانا LRT» جشس جولاۋشىلار كولىگى ءبولىمىنىڭ مامانى ابدىحاميت تاماباەۆ.

ايتا كەتەيىك، قازىرگى تاڭدا جۇمىسسىز جۇرگەن ازاماتتاردىڭ كوپشىلىگى وتباسىن اسىراۋ ءۇشىن وسىلاي زاڭسىز تاكسي قىزمەتىن ۇسىنادى. ال ەگەر مۇنداي تەكسەرۋ جۇمىستارى تەك استانا عانا ەمەس، باسقا قالالاردا دا جۇرگىزىلەتىن بولسا، وندا ۇكىمەتكە تاكسي بولىپ نانىن تاۋىپ جەپ جۇرگەن ازاماتتاردى جۇمىسپەن قامتۋدىڭ جاڭا رەفورماسىن جاساپ شىعۋعا تۋرا كەلەدى.

“The Qazaq Times”