اقش پرەزيدەنتى دونالد ترامپ. فوتو: AP Photo / Andrew Harnik

نۇرسۇلتان نازارباەۆ امەريكا قۇراما شتاتتارىنىڭ پرەزيدەنتى دونالد ترامپپەن تەلەفون ارقىلى سويلەستى، دەپ حابارلايدى اقوردانىڭ ءباسپاسوز قىزمەتى. 

اڭگىمەلەسۋ بارىسىندا دونالد ترامپ قازاقستان پرەزيدەنتىن استاناداعى «EXPو-2017» حالىقارالىق كورمەسىنىڭ تابىستى وتۋىمەن قۇتتىقتاپ، امەريكا دەلەگاتسياسىنىڭ وسى ءىس-شاراعا قاتىسۋىنىڭ ناتيجەلەرىن جوعارى باعالاعان.

مەملەكەت باسشىسى نۇرسۇلتان نازارباەۆ تەحاس شتاتىنداعى ونداعان ادامنىڭ ءومىرىن قيعان تابيعات اپاتىنا بايلانىستى كوڭىل ايتىپ، زارداپ شەككەن اۋداندارداعى ينفراقۇرىلىمنىڭ تەزىرەك قالپىنا كەلۋىنە جانە جەرگىلىكتى حالىقتىڭ قالىپتى تىرشىلىككە قايتا ورالۋىنا تىلەكتەستىگىن بىلدىردى.

اقوردانىڭ مالىمەتىنشە، ەكى ەل باسشىلارى بيىلعى 21 مامىردا ەر-ريادتا وتكەن «يسلام الەمى – اقش» ءسامميتى اياسىنداعى العاشقى كەزدەسۋدىڭ استانا مەن ۋاشينگتون اراسىنداعى ىنتىماقتاستىقتى نىعايتۋ ىسىندەگى ماڭىزدىلىعىن اتاپ ءوتتى.

پرەزيدەنتتەر قازاقستان مەن امەريكا قارىم-قاتىناسىنىڭ جاعدايىن جانە ونىڭ دامۋ پەرسپەكتيۆالارىن تالقىلادى. بۇل رەتتە تاراپتار ەكىجاقتى ساۋدا-ەكونوميكا سالاسىنداعى ءوزارا ءىس-قيمىلدى نىعايتۋ تۋرالى ۋاعدالاسقان.

پرەزيدەنتتەر وڭىرلىك جانە حالىقارالىق كۇن تارتىبىندەگى وزەكتى ماسەلەلەر جونىندە پىكىر الماستى. نۇرسۇلتان نازارباەۆ قازاقستاندا بيىلعى 29 تامىزدا جۇمىسىن باستاعان تومەن بايىتىلعان ۋران بانكىنىڭ جاھاندىق قاۋىپسىزدىكتى نىعايتۋداعى ماڭىزدىلىعىنا نازار اۋداردى.

ەكى ەل كوشباسشىلارى امەريكا-رەسەي قارىم-قاتىناستارىنىڭ جاعدايىنا جەكە توقتالدى. قازاقستان پرەزيدەنتى ۋاشينگتون مەن ماسكەۋ اراسىنداعى ديالوگتىڭ جاقساراتىنىنا سەنىم ءبىلدىردى.

دونالد ترامپ نۇرسۇلتان نازارباەۆتى ۋاشينگتونعا رەسمي ساپارمەن كەلۋگە شاقىردى.

مەملەكەتتەر باسشىلارى اڭگىمە سوڭىندا ەكى جاقتىڭ دا مۇددەلى بولاتىن ماسەلەلەرى جونىندەگى تۇراقتى ديالوگتى قولداۋعا نيەتتى ەكەندىكتەرىن ءبىلدىردى.

تەلەفون ارقىلى سويلەسۋگە اقش جاق باستاماشى بولعان.

“The Qazaq Times”