يسلام كارىموۆتىڭ قورعاۋشىسى ۆاسيلي ماتۆيەنكو.

ماسكەۋدە وزبەكستاننىڭ بۇرىنعى پرەزيدەنتى يسلام كارىموۆتىڭ قورعاۋشىسى ۆاسيلي ماتۆيەنكو جۇمباق جاعدايدا كوز جۇمدى، دەپ جازدى «موسكوۆسكي كومسومولەتس» باسىلىمى.

تامىزدىڭ 21-ءى كۇنى جەرگىلىكتى ۋاقىت بويىنشا تۇنگى ساعات 1:30 شاماسىندا ماسكەۋ قالاسىنىڭ ماڭىنداعى «سوۆەتسكي پيساتەل» ساياجاي قالاشىعىندا وزبەكستاننىڭ بۇرىنعى پرەزيدەنتى يسلام كارىموۆتىڭ قورعاۋشىسى بولعان ۆاسيلي ماتۆيەنكو ءوزىن-ءوزى جۇرەك تۇسىنان اتىپ تاستاعان. ماتۆيەنكونىڭ جۇبايى ەلەنانىڭ سوزىنشە، ۆاسيلي قايعىلى وقيعاعا دەيىن جالعىز ءوزى ءبىر ليتردەن استام يرلانديا ۆيسكيىن ىشكەن جانە كىشى كاليبرلى پسم تاپانشاسىنىڭ شۇرتپەسىن ابايسىز باسىپ قالعان.

وسىدان كەيىن وقيعا ورىنىنا كەلگەن قۇقىق قورعاۋ ورگاندارىنىڭ قىزمەتكەرلەرى ماتۆيەنكونىڭ گاراجىنان ەشقانداي قۇجاتتارى جوق، سەريالىق ءنومىرى وشىرىلگەن ەكى بىردەي تاپانشا، پنەۆماتيكالىق تاپانشا، ف-1 گراناتاسىنىڭ بولشەكتەرى، گيلزا مەن وق ءدارى تاركىلەگەن.

ۆاسيلي ماتۆيەنكو ماسكەۋگە 2016 جىلدىڭ 2 قىركۇيەگىندە يسلام كارىموۆ قايتىس بولعانان كەيىن كوشىپ كەلگەن. بىراق ول وسى ۋاقىت ارالىعىندا وزبەكستانعا ءجيى بارىپ تۇرعان. سوڭعى رەت تاشكەنتتەن ماسكەۋگە 21 تامىز كۇنى قايتىپ ورالعان. 38 جاستاعى ۆاسيلي ماتۆيەنكو يسلام كارىموۆتىڭ ءتىرى كەزىندە وزبەكستان ءىىد پولكوۆنيگى قىزمەتىن اتقارعان.

“The Qazaq Times”