فوتو: ۆەچەرني بيشكەك

قىرعىزستان سوتى ەلدەگى جالعىز وپپوزيتسيالىق تەلەارنانى جاۋىپ تاستادى.

بىشكەك قالاسىنىڭ پەرۆوماي اۋداندىق سوتى «سەنتيابر» وپپوزيتسيالىق تەلەارناسىنىڭ جۋرناليستەرىن تامىزدىڭ 22-ءسى كۇنى ساعات 14:00-دە قىرعىزستان باس پروكۋراتۋراسىنىڭ ءوتىنىشى بويىنشا باستالعان سوت وتىرىسىنا شاقىرعان.

«سەنتياربر» ارناسىنىڭ رەسمي وكىلى قايىرگۇل ۇرۇمقانوۆانىڭ ايتۋىنشا، سوت قىزمەتكەرلەرى تەلەارناعا تىكەلەي ەفيردە كورەرمەندەردى قابىلدايتىن تەلەفون نومىرىنە حابارلاسىپ، سوت وتىرىسىنا شاقىرعان. سوت پروتسەسسى قورعاۋشىسىز، تەلەارنا باسشىسىنسىز وتكەن.

قىرعىزستان باس پروكۋراتۋراسىنىڭ تاراتقان مالىمەتى بويىنشا، «سەنتيابر» تەلەارناسىنا بايلانىستى قىلمىستىق ءىس ارنا باسشىلىعى ەفيردەن "ەكسترەميستىك باعىتتاعى ماتەريالداردى ناسيحاتتاعاننان" كەيىن بارىپ قوزعالعان. اتاپ ايتقاندا قىلمىستىق ءىس قوزعاۋعا 2015 جىلى وش وبلىسىنىڭ ىشكى ىستەر دەپارتامەنتىنىڭ ەكس-باسشىسى ءابدىلدا قاپاروۆتىڭ «سەنتيابر» تەلەارناسىنىڭ تىكەلەي ەفيرىندە وش وبلىسىنىڭ ەكس-گۋبەرناتورى، ەكس-پرەمەر-مينيستر، قىرعىزستان پرەزيدەنتتىگىنە ۇمىتكەر سوورونباي جەەنبەكوۆ پەن قىرعىز پارلامەنتىنىڭ ەكس-سپيكەرى اسىلبەك جەەنبەكوۆتى وش وقيعاسىنانان كەيىن ەلدى-مەكەندى قالپىنا كەلتىرۋگە بايلانىستى بولىنگەن قارجىنى جىمقىردى دەگەن ايىپتاۋى سەبەپ بولعان.

«سپۋتنيك» اگەنتتىگىنىڭ حابارلاۋىنشا، 2015 جىلى 11-ءشى ساۋىردە وتكەن قىرعىز وپپوزيتسياسىنىڭ فورۋمىندا قاپاروۆ وش وقيعاسى كەزىندە اسىلبەك جەەنبەكوۆ بۇلىكشىلەردى قارۋ-جاراقپەن قامتاماسىز ەتىپ، ۇرىس الاڭىنا 170 اۆتومات پەن 70 تاپانشا اكەلگەنىن ايتقان. بىراق قىرعىزستان باس پروكۋراتۋراسى 2017 جىلى قىلمىستىق ءىستى جەەنبەكوۆتىڭ ۇستىنەن ەمەس، قاپاروۆتىڭ ۇستىنەن قوزعاپ، سوت ونى 4 جىلعا باس بوستاندىعىنان ايىرعان.

قازىرگى تاڭدا اعايىندى سوورونباي جانە اسىلبەك جەەنبەكوۆتار قىرعىزستان ساياسي الاڭىنداعى وڭتۇستىك كلاننىڭ بەلدى مۇشەلەرى. سوورنوباي جەەنبەكوۆ الدا كەلە جاتقان سايلاۋدا پرەزيدەنتتىككە باستى ۇمىتكەرلەردىڭ ءبىرى. ويتكەنى ونى ەلدىڭ قازىرگى پرەزيدەنتى المازبەك اتامباەۆ قولداۋدا.

بەيرەسمي مالىمەتتەر بويىنشا، كەشە جابىلىپ قالعان «سەنتيابر» تەلەارناسى وتكەن اپتادا سوتتالعان وپپوزيتسيالىق ساياساتكەر ومىربەك تەكەەباەۆتىڭ باستاماسىمەن قۇرىلعان. «سەنتيابر» ارناسى وسى ۋاقىتقا دەيىن قىرعىزستان اۋماعىندا جۇمىس ىستەپ كەلگەن جالعىز وپپوزيتسيالىق تەلەارنا بولعان.

“The Qazaq Times”