بارسەلوناداعى جارىلىسقا كىنالى كۇدىكتى پوليتسيا قولىنان ءولدى

يسپانيا بيلىگى وتكەن اپتادا 13 ادامنىڭ قازاسىنا سەبەپكەر بولعان تەرراكتىنى جاساعان جۇك كولىگىنىڭ جۇرگىزۋشىسىن قولعا ءتۇسىرۋ بارىسىندا، كۇدىكتىنىڭ پوليتسيا قىزمەتكەرلەرىنىڭ قولىنان ولگەنىن جاريالادى. بۇل تۋرالى CNN اقپاراتتىق اگەنتتىگى جازدى. 

Younes Abouyaaqoub ەسىمدى مارروكالىق ازامات يسپانيانىڭ باتىسىندا ورنالاسقان شاعىن ەلدىمەكەندەردىڭ بىرىندە كوزگە تۇسكەن. ول تۋرالى پوليتسياعا حابارلاعان ايەل اپتاپ ىستىقتا ۇزىن جەڭدى، قالىڭ كيىمدە جۇرگەن بەلگىسىز ازامات بىردەن كۇدىك تۋدىرعانىن ايتادى. پوليتسيا كەلگەن كەزدە ونىڭ بەلىندە جارىلعىش زاتتاردان جاسالعان بەلبەۋ بولعان جانە ول پىشاقپەن قارۋلانعان. پوليتسيا اتقان وقتان جارالانعان كۇدىكتىنىڭ بەلىندەگى جارىلعىش زاتتى شەشىپ، قاۋىپسىزدىك ورناتۋ ءۇشىن ونىڭ جانىنا ارنايى روبوت جىبەرىلگەن.

وتكەن اپتادا قالىڭ حالىقتىڭ اراسىنا قاساقانا باعىتتالعان كولىكتىڭ سالدارىنان 13 ادام قازا تاپقان قايعىلى كۇنى Younes Abouyaaqoub وقيعا ورنىنان بىردەن ءىزىن سۋىتقان. جولاي باسقا كولىك جۇرگىزۋشىسىن ءولتىرىپ، ونىڭ مۇلكىن الىپ، بەلگىسىز باعىتتا جاسىرىنعان.

كاتالونيانىڭ ىشكى ىستەر ءمينيسترى حواكيم فورن جەرگىلىكتى راديوعا بەرگەن سۇحباتىندا: "بارلىق دەرەكتەر ماروككالىق ازاماتتىڭ كىنالى ەكەندىگىن كورسەتەدى", -  دەپ مالىمدەدى. كاتالونيانىڭ پوليتسيا قىزمەتى Younes Abouyaaqoub -تىڭ يسپانياداعى تەرراكتىلەرگە قاتىسى بار دەگەن 12 كۇدىكتىنىڭ قاتارىندا بولعانىن ايتادى. ولاردىڭ مالىمەتىنشە، قازىر 12 ازاماتتىڭ 4-ەۋى قولعا ءتۇسىپ، 8-ءى ولتىرىلگەن.

“The Qazaq Times”