فوتو: inform.kz

مىندەتتى الەۋمەتتىك مەديتسينالىق ساقتاندىرۋ بويىنشا حالىققا مەديتسينالىق كومەك كورسەتۋ 2018 جىلدىڭ 1 قاڭتارىنان باستالمايدى. قر دەنساۋلىق ساقتاۋ مينيسترلىگى اتالعان جۇيە بويىنشا مەدكومەك كورسەتۋ مەرزىمىن 2020 جىلدىڭ 1 قاڭتارىنان باستاۋ تۋرالى شەشىم قابىلدادى. اتالعان زاڭ جوباسى ماجىلىستە تالقىلاندى.

ء"مامس-كە وتۋدەگى نەگىزگى پروبلەما ءوزىن ءوزى جۇمىسپەن قامتىعانداردى انىقتاۋدا بولىپ وتىر. سوندىقتان وسىعان بايلانىستى، سىزدەردىڭ نازارلارىڭىزعا زاڭ جوباسى ۇسىنىلادى. بۇل بويىنشا ءمامس-كە قاتىسۋشىلارعا مەديتسينالىق كومەك كورسەتۋ مەرزىمىن 2020 جىلدىڭ 1 قاڭتارى دەپ جانە جەكە تۇلعالاردىڭ، قىزمەتكەرلەردىڭ، ءوزىن-ءوزى جۇمىسپەن قامتىعانداردىڭ،  جەكە كاسىپكەرلەردىڭ، سونداي اق، مەملەكەتتىڭ (جەڭىلدىك قاراستىرىلعان ازاماتتارعا) جارنا تولەۋ مەرزىمىن 2020 جىلدىڭ 1 قاڭتارى دەپ ناقتىلاۋ ۇسىنىلىپ وتىر", - دەدى قر دەنساۋلىق ساقتاۋ ۆيتسە-ءمينيسترى ءلاززات اقتاەۆا.

ونىڭ سوزىنشە، ازاماتتىق-قۇقىقتىق كەلىسىمشارت بويىنشا تابىس الاتىن جەكە تۇلعالاردىڭ اۋداراتىن جارنالارى 5%-دان 1%-عا دەيىن تومەندەتىلەدى. ال جۇمىس بەرۋشىلەردەن جينالاتىن جارنا كولەمى 1,5% دەڭگەيىندە 2018-2019 جىلدار ارالىعىندا جالعاسادى.

ايتا كەتەيىك، بۇدان بۇرىن قازاقستان پرەزيدەنتى نۇرسۇلتان نازارباەۆ مىندەتتى الەۋمەتتىك مەديتسينالىق ساقتاندىرۋ جۇيەسىندەگى كەمشىلىكتەرگە نازار اۋدارىپ، اتالعان جۇيەنى ەنگىزۋگە اسىقپاۋعا شاقىرعان ەدى.

“The Qazaq Times”