فوتو: گازەتا

اقش-تىڭ مەملەكەتتىك حاتشىسى رەكس تيللەرسون 2016 جىل ءۇشىن ءدىن ەركىندىگى بويىنشا بايانداما جاسادى. اتالعان قۇجاتتا امەريكانىڭ جاقىن وداقتاسى ساۋد ارابياسى مەن باحرەيندە ءدىن ەركىندىگى شەكتەلىپ، ازشىلىق توپتارعا قارسى گەنوتسيد جاسالعان دەلىنگەن. بۇل تۋرالى Reuters اقپاراتتىق اگەنتتىگى جازدى. 

رەكس تيللەرسون ساۋد ارابياسىنداعى تەرروريزمگە قارسى كۇرەس تۋرالى زاڭ شيت مۇسىلماندارىنا ديسكريميناتسيا جاساۋعا جانە اتەيستەر مەن مەملەكەتتىڭ ءدىني ۇستانىمدارىنا قارسى كەلگەن ازاماتتاردى جازالاۋعا قولدانىلعانىن جەتكىزدى.

مەملەكەتتىك حاتشى پارسى شىعاناعىنداعى شيت مۇسىلماندارىنىڭ قۇقىقتارىن شەكتەپ وتىرعان تاعى ءبىر مەملەكەت رەتىندە باحرەيندى اتادى. ءدىن ەركىندىگىنە قاۋىپ ءتونىپ وتىرعان ەلدەردىڭ ساناتىنا پاكىستان دا كىردى.

تۇركيانىڭ جاعدايىنا ەرەكشە توقتالعان رەكس تيللەرسون، تەرروريستىك ۇيىممەن بايلانىسى بار دەگەن ايىپپەن كوپ ادامنىڭ جاۋاپكەرشىلىككە تارتىلعانىن اتاپ ءوتتى.

قىتايداعى تيبەت بۋدديستەرى مەن جەرگىلىكتى مۇسىلمانداردى ءدىني سەنىمدەرى ءۇشىن اباقتىعا جاۋىپ، قۇلشىلىق ورىندارىن سالۋعا رۇقسات ەتپەي وتىرعانىنا نارازىلىق بىلدىرگەن مەملەكەتتىك حاتشى اقش پرەزيدەنتى دونالد ترامپتىڭ بوسقىنداردى قابىلداماۋ، ەلدەن شىعارۋ تۋرالى شەشىمى مەن اراب مەملەكەتتەرى ازاماتتارىنىڭ مەملەكەتكە كىرگىزبەۋ تۋرالى باستامالارى جونىندە جاق اشپادى.

“The Qazaq Times”