قازاقستاننىڭ ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆ

«بارىنە بىردەي ۇنايدى دەپ كۇتۋگە بولمايدى. بىزدە ونداي يلليۋزيا جوق.
ءبىز قوعامنىڭ بارلىق جىگى مەن توپتارىنىڭ مۇددەلەرىن ەسكەرە وتىرىپ،
مەملەكەتتىڭ مۇددەسىن نەگىزگە الامىز. ەڭ باستىسى – مەملەكەت مۇددەسىن قاتاڭ ساقتاۋ. ارينە، بارىنە ۇناۋى مۇمكىن ەمەس». قازاقستاننىڭ ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆ Sayasat.kz سايتىنا بەرگەن سۇحباتىندا ء"دىن سالاسىنداعى زاڭناماعا ەنگىزىلەتىن تۇزەتۋلەردى قوعام قالاي قابىلداۋى مۇمكىن؟" دەگەن ساۋالعا وسىلاي جاۋاپ بەردى.

ايتا كەتەيىك، وسى جىلدىڭ 20 ماۋسىمى كۇنى قر پرەزيدەنتى نۇرسۇلتان نازارباەۆتىڭ جارلىعىمەن قازاقستان رەسپۋبليكاسىنىڭ ءدىن سالاسىنداعى مەملەكەتتىك ساياساتىنىڭ 2017 – 2020 جىلدارعا ارنالعان تۇجىرىمداماسى بەكىتىلدى. اتالعان قۇجاتتى ءدىن ىستەرى جانە ازاماتتىق قوعام مينيسترلىگى ازىرلەگەن.

ءمينيستردىڭ سوزىنشە، تۇجىرىمداما زاڭ جوبالاۋ ءۇشىن جانە ساياسي-تەوريالىق
نەگىزدەردى قۇرۋ ءۇشىن قاجەت. تۇجىرىمدامانىڭ نەگىزىندە زاڭناماعا وزگەرىستەر
مەن تولىقتىرۋلار توپتاماسىن ازىرلەۋ بويىنشا جۇمىس جۇرگىزىلۋدە. ەگەر
ونى تالقىلاۋ وڭ ناتيجە بەرەتىن بولسا، 13 زاڭ مەن 4 كودەكسكە شامامەن 60
تۇزەتۋ مەن تولىقتىرۋلار ەنگىزىلەدى.

سونداي-اق، ۆەدومستۆا باسشىسى: «ءبىز زاڭنامانى ازىرلەۋ كەزىندە
قوعامنىڭ پىكىرىنە جۇگىنەمىز جانە تۇزەتۋلەردى قوعامنىڭ بارلىق وكىلدەرىمەن
اشىق تۇردە تالقىلاۋ قاعيداسىن ۇستانامىز. وسى زاڭ جوباسىن دايىنداۋ
كەزىندە، جوبا ساراپشىلاردىڭ، ءدىني بىرلەستىك وكىلدەرىنىڭ، ۇەۇ وكىلدەرىنىڭ
كوپتەگەن تالقىلاۋىنان ءوتتى. بۇل جۇمىس ءالى دە جالعاسادى. قاراشا-جەلتوقسان ايلارىندا ونى ماجىلىسكە جولداۋدى جوسپارلاپ وتىرمىز» - دەدى.

“The Qazaq Times”