ترامپ: سولتۇستىك كورەيا ءوزىن ۇستاي بىلگەنى ەڭ ابزال

اقش پەن سولتۇستىك كورەيا اراسىندا ءبىر-بىرىنە باعىتتالعان سەس كورسەتىپ، ايبار شەگۋ، ەسكەرتۋلەر مەن ايىپتاۋ سوزدەرىن جولداۋ تولاستار ەمەس. وسى اپتادا اقش پرەزيدەنتى دونالد ترامپ سولتۇستىك كورەياعا قاراتا جاساعان ەسكەرتۋىندە: «ەگەر كحدر اقش-قا قاۋىپ توندىرگەنىن توقتاتپاسا، ونى تەك قانا سۇراپىل ءورت كۇتىپ تۇر» دەگەن ەدى. ال، كەشە سويلەگەن سوزىندە بۇل ەسكەرتۋىنىڭ ايتارلىقتاي قاتاڭ بولماعانىن العا تارتتى. ول الدىنعى ەسكەرتۋىنە ۇستەمە رەتىندە: «سولتۇستىك كورەيا ءوزىن ءوزى ۇستاي بىلگەنى ەڭ ابزال. ولاي بولماعاندا ءبىر ەمەس بىرنەشە ەلدىڭ قاتاڭ سوققىسىنا تاپ بولادى»، – دەدى. بۇل تۋرالى اقش-تىڭ تانىمال باسىلىمى «The Wall Street Journal» باسىلىمى حابارلادى.

ترامپ سوزىندە: «قازىر كەيبىر ادامدار اقش جانە وزگە وداقتاس ەلدەردىڭ ورنىنان ورە تۇرەگەلەتىن كەزى جەتتى دەپ قارايدى. بۇلاردىڭ قايتارىم جاۋابى اۋەلدەگىدەن الدە قايدا قاتاڭ بولاتىنى انىق. ءبىز بۇنى جۇرە كورەتىن بولامىز»، – دەدى. بۇل اقش ۇكىمەتىنىڭ سولتۇستىك كورەيانىڭ يادرولىق باعدارلاماسىنا قاراتقان ەڭ جاڭا ەسكەرتۋلەرىنىڭ ءبىرى.

ترامپ اقش قارۋلى كۇشتەرى ءوزىنىڭ ۇستانىمىن تولىقتاي قولدايدى دەپ قارايدى. پرەزيدەنت ترامپ ءبىر جاقتىلى كوشباسشىنىڭ پارمەنىمەن، سوعىس قوزعاۋ مۇمكىندىگىڭىز بار ما دەگەن سۇراققا، «ولاي دەي المايمىن، مەن ەشقاشان وعان جاۋاپ بەرە المايمىن» دەدى. سونىمەن بىرگە ول امەريكالىقتارعا الاڭسىز بولسىن دەپ كەپىلدىك بەردى. ەگەر سولتۇستىك كورەيا الدىمەن سوعىس قوزعايتىن بولسا اقش پەن ونىڭ وداقتاستارى بۇل ءىستىڭ جاۋابىن كەلىستىرىپ الاتىنىن، ءارى، ءىستىڭ سولتۇستىك كورەيا ويلاعان باعىتقا دامىمايتىنىن ايتتى.

“The Qazaq Times”