قىتاي دەموگرافيالىق داعدارىسىنا قاتىستى دەرەكتەر

الەمدە حالىق سانى ەڭ كوپ ەل سانالاتىن قىتايدا كوپ جىلدان بەرى دەموگرافيالىق داعدارىس قالىپتاسىپ ۇلگەردى. ەلدىڭ ازاماتتىق ىستەر مينيسترلىگى جاقىندا قىتايدىڭ دەموگرافيالىق جاعدايىنان ءبىر قاتار جاڭا ستاتيستيكالاردى تاراتتى. بۇل تۋرالى «شينلاڭ» اگەنتتىگىنىڭ رەسمي سايتى جازدى.

2015 جىلى جاريالانعان «قىتاي ستاتيستيكالىق جىلناماسى» اتتى كورسەتكىشتە ەل كولەمىندە 15 جاستان اسقان بويداقتاردىڭ سانى 251 ملن دەلىنگەن. ونىڭ 134 ميلليونى ەرلەر، ال ايەلدەر سانى 117 ملن ادام. جىنىستار اراسىنداعى الشاقتىق 17 ملن ادامدى قۇرايدى. دەمەك 2015 جىلدىڭ وزىندە قىتايدا باس ارتىق 17 ملن بويداق ەركەك بار. سول كورسەتكىشتە بۇل الشاقتىق جىل وتكەن سايىن ۇلعايا بەرەتىندىگى تۋرالى ايتىلعان. 15 جاستان اسقان بويداقتار سانى ەل حالقىنىڭ 18,4 پايىزىن قۇرايدى.

اتالعان مينيسترلىك جاريالاعان مالىمەتكە قاراعاندا 60 جاستان اسقان قىتايلىق قارتتاردىڭ سانى 230 ملن 800 مىڭ ادامعا جەتكەن. سونىڭ ىشىندە 150 ملن 30 مىڭ ادام 65 جاستان جوعارى قارتتار بولىپ سانالادى. بۇل قىتاي حالقىنىڭ ءار بەسىنشى ادامى 60 جاستان اسقان قارتتار ەكەنىن، ال ءار ءۇشىنشى ادام قارت نەمەسە ورتا جاستان اسقان ادام ساناتىندا ەكەنىن بىلدىرەدى. مينيسترلىكتىڭ بەرگەن مالىمەتىنشە، ەل كولەمىندە 140 مىڭ قارتتار ءۇيى بار. الايدا، وسى قارتتار ۇيىندە تۇراتىن ءار ءبىر 1000 قارت ادامعا 32 توسەك ورىننان تۋرا كەلەدى. ياعني، ەلدەگى قارتتار ءۇيىنىڭ سانى، قارتتار ۇيىنە تۇراتىن قارتتاردىڭ قاجەتتىلىگىن تولىق وتەي المايدى.

وتكەن جىلعى ساناق بويىنشا قىتايدا 460 مىڭ جەتىم بالا بار دەلىنگەن. ولاردىڭ 88 مىڭى ۇكىمەتكە قاراستى بالالار ۇيىندە تۇرادى. 2016 جىلدىڭ وزىندە 19 مىڭ بالانى قىتايلىق جانە شەتەلدىك ازاماتتار اسىراپ العان.

“The Qazaq Times”