دوپينگ قولدانعان سپورتشىلار قىلمىستىق جاۋاپقا تارتىلۋى مۇمكىن

ەندى قازاقستاندا دوپينگ قولدانعان سپورتشىلار قىلمىستىق جاۋاپقا تارتىلۋى مۇمكىن. ءتىپتى سپورتشىنىڭ ءوزى عانا ەمەس، جاتتىقتىرۋشىدان باستاپ دارىگەر، كەڭەسشىلەر دە زاڭ الدىندا جاۋاپ بەرەدى. بۇل تۋرالى 24 حابار ارناسى حابارلادى.  

مۇنداي زاڭ جوباسىنىڭ تۇجىرىمداماسى ادىلەت مينيسترلىگىندە وتكەن ۆەدومستۆوارالىق كوميسسيا وتىرىسىندا تالقىلاندى. سونداي-اق ەگەر حالىقارالىق دوپينگكە قارسى ۇيىم قاننان تىيىم سالىنعان پرەپاراتتى تاپسا، سپورتشى ۇلتتىق قۇرامنان شىعارىلادى. وعان قوسا العان جۇلدەسى مەن مەملەكەت بەرگەن بارلىق ماتەريالدىق سىياقىلارىنان ايىرىلادى.

"جۇلدەمەن ورالعانى ءۇشىن مەملەكەتتەن العان سىيلىقتارىنىڭ بارلىعى قايتارىلۋى ءتيىس. وزدەرىڭىز بىلەتىندەي، وليمپيادا ويىندارىنان جەڭىسپەن ورالعان سپورتشىلارعا ۇكىمەت پاتەر بەرەدى. زاڭ جوباسى بويىنشا سول ۇيلەردى ون جىلعا دەيىن مەملەكەت مەنشىگىندە قالدىرماقپىز. ەگەر سوڭعى ون جىلدا سپورتشىنىڭ جۇلدەسى دوپينگ داۋى بويىنشا قايتارىلسا، پاتەردى دە، سىياقىنى دا مەملەكەت الىپ قويۋعا قۇقىلى بولادى", - سپورت جانە دەنە شىنىقتىرۋ ىستەرى كوميتەتى توراعاسىنىڭ ورىنباسارى سەرىك جاراسباەۆ.

ايتا كەتەيىك، قازاقستاندا دوپينگ داۋى 2016 جىلدىڭ ماۋسىم ايىندا باستالعان. دوپينگ بويىنشا تەكسەرۋدەن كەيىن قازاقستاندىق اۋىر اتلەتتەردىڭ قان قۇرامىنان تىيىم سالىنعان پرەپاراتتار تابىلعان بولاتىن. سالدارىنان حالىقارالىق وليمپيادا كوميتەتى يليا ءيليننىڭ پەكين جانە لوندون وليمپياداسىنداعى التىن مەدالدارىن جانە مايا مانەزا، زۋلفيا چينشانلو مەن سۆەتلانا پودوبەدوۆانىڭ لوندونداعى التىن مەدالدارىن كەرى قايتارعان ەدى.

“The Qazaq Times”