الەمدىك انتيدوپينگ اگەنتتىگى رەسەيدى حالىقارالىق سپورت جارىستارىنان 4 جىلعا شەكتەۋ تۋرالى ۇسىنىس ءبىلدىردى. بۇعان ماسكەۋدىڭ انتيدوپينگ لابوراتورياسىنداعى مالىمەتتەردى جاسىرۋ ءىسى سەبەپ بولعان.

اتالعان اگەنتتىكتىڭ اتقارۋ كوميتەتىنىڭ جيىنى 9 جەلتوقسان كۇنى پاريجدە وتپەك. تانىمال ءارى ىقپالدى باسىلىم The New York Times بولسا، اتقارۋ كوميتەتى اگەنتتىكتىڭ ۇيعارىمىن قابىل الۋى مۇمكىن ەكەنىن جازعان. اگەنتتىكتىڭ ۇسىنىسىندا رەسەي سپورتشىلارىن 4 جىل بويى حالىقارالىق جارىستارعا قاتىسۋىنا شەكتەۋ قويۋ، تەك «تازا سپورتشىلار» عانا قاتىسۋىنا مۇمكىندىك بەرۋ، ونىڭ وزىندە رەسەيدىڭ ءانۇرانى مەن تۋىن قولدانباۋ سىندى ۇسىنىستار دا قاراستىرىلعان.

بۇل الەم چەمپيوناتتارىندا جانە وليمپيادا ويىندارىندا رەسەيدىڭ تۋى كوتەرىلمەيدى دەگەندى بىلدىرەدى. سونىمەن قاتار رەسەيدە وتكىزۋ جوسپارلانعان بىرقاتار حالىقارالىق جارىستار باسقا ەلدەرگە بەرىلۋى مۇمكىن. ايتالىق، فۋتبول بويىنشا ەۋروپا چەمپيوناتىنىڭ (2020 جىلى) رەسەي قالالارىندا وتەتەنى جارىستارى، چەمپيوندار ليگاسىنىڭ فينالى (2021), ۆولەيبول بويىنشا الەم چەمپيوناتى (2022), ۋنيۆەرسيادا (2023), حوككەي بويىنشا الەم چەمپيوناتى (2023), «فورمۋلا-1» جانە وزگە دە بىرقاتار بەلدەسۋلەر باسقا ەلدەرگە بەرىلۋى مۇمكىن.

بىلتىر وتكەن وليمپيادا كەزىندە رەسەي سپورتشىلارىنا ءوز مەملەكەتىنىڭ تۋى الدىندا بەلدەسۋگە شەكتەۋ قويعان بولاتىن. كەيبىر زەرتتەۋلەر رەسەي سپورتشىلارىنىڭ دوپينگ قولدانۋ سالىستىرماسى الەمنىڭ الدىنعى قاتارىندا تۇرادى دەپ كورسەتكەن.

“The Qazaq Times”