ماسكەۋ – 11 قاڭتار سارسەنبىدە حابارلاما جاريالاپ، رەسەي دونالد ترامپتىڭ جەكە باسىندىق قۇپياعا قول سۇعىپ وتىر دەگەندى تەرىسكە شىعاردى. ەسكە سالا كەتسەك، ەكى كۇن بۇرىن اقش قاۋىپسىزدىك جانە بارلاۋ ورگانىنىڭ ەكى قىزىمەتكەرى ءوز پرەزيدەنتتەرىنە (باراك وباما مەن دونالد ترامپقا) مالىمدەمە جاساپ «رەسەيلىك حاكەرلەر ترامپتىڭ جەكە باسىندىق قۇپيالارىنا قول جەتكىزىپ وتىر، ونىڭ ىشىندە ترامپتىڭ جۇرتقا جاريالاي المايتىن ورەسكەل قىلىقتارى دا بار» دەگەن بولاتىن. بۇل تۋرالى The New York Times-تا كولەمدى ماقالا جاريالاندى.

رەسەي جاق بۇنى تەرىسكە شىعاردى جانە رەسەي-اقش قارىم-قاتىناسىن ءبۇلدىرۋ ءۇشىن جاسالعان «شاتپاق» دەپ باعالادى. كرەمل باس حاتشىسى دميتري بەسكوۆ تۇراقتى ءباسپاسوز ءماسليحاتىندا: «كرەمل ترامپتىڭ جەكە باسىنا ساياتىن قانداي دا ءبىر سولەكەت ماتەريالدارعا قول جەتكىزگەن جوق. بۇل تۋرالى ايتىلعان سوزدەر شىندىققا سايكەس كەلمەيدى، بارلىعى ويدان قۇراستىرىلعان فانتازيالىق اڭگىمە»، -  دەپ سالدى. «كەيبىر ادامدار ارانداتۋ ءۇشىن مۇنداي قيتۇرقى ارەكەتتەر ويلاپ تابادى. ولار اركۇنى جوق جەردەن «جالماۋىز» تاۋىپ جاتادى. بۇل ءبىر جاعىنان ترامپتىڭ ەشقانداي نەگىزى جوق سوزگە سەنۋى»، - دەدى دميتري بەسكوۆ.

ەكى كۇن بۇرىن دونالد ترامپ ءوزىنىڭ Twitter پاراقشاسىنا « رەسەي ورگاندارىنىڭ مۇنداي ماتەريالداردى جيناۋى بولاشاق بوپسالاۋ ءۇشىن جاساعان ارەكەتى. جالعان اقپاراتتاردىڭ ءبارى ساياساتتاعى «جالماۋىز اۋلاۋمەن» بىردەي»، - دەپ جازعان بولاتىن.

اقش بارالاۋ قىزمەتكەرلەرىنىڭ ايتۋىنشا رەسەي 2013 جىلى ترامپتىڭ ماسكەۋدەگى قوناق ۇيدە سىبايبيكەشپەن كوڭىل كوتەرگەن كەزىندە تۇسىرىلگەن كەسكىنگە قول جەتكىزىپ وتىر، بۇل ناعىز كومپرومات بولىپ سانالادى. بۇنى ورىس باق-ى سەس كورسەتۋدىڭ قۇرالى رەتىندە پايدالانۋى مۇكىن دەپ وتىر. بۇل ماتەريالداردى وتستاۆكاداعى بريتاندىق اگەنت دايىنداعانى دا ءمالىم بولدى. بۇل ءۇشىن رەسەيلىك جەلىلەر مەن وزگەدە قۇپيا اقپاراتتاردى پايدالانعان دەلىندى.

ترامپ رەسمي تاققا وتىرۋعا دەيىن رەسەيدىڭ اقش دەموكراتيالىق سايلاۋعا ارالاسقانىن دا مويىنداماي كەلگەنىن، وزىنە تۇسەتىن ساياسي قىسىمدار مەن بارلاۋ ورگانىنان قول ءۇزىپ قالماس ءۇشىن رەسمي ماراپاتتاۋدان ىلگەنى بۇنى اشىق مويىنداعانىن دا وسى اپتانىڭ باسىنداعى ماقالالارىمىزدا ايتقان بولاتىنبىز. ترامپتىڭ پرەزيدەنتتىككە كەلۋى الەمدى وسى قاتارلى ساياسي اڭگىمەلەرگە تولتىرىپ جىبەردى. اقش جۇرتشىلىعى ترامپتىڭ ساياساتىنىڭ تۇراقسىز بولۋىنان الاڭداسا، قىتاي، رەسەي، ەۋروپا سىندى ەلدەرگە اقش-تىڭ الداعى گەوساياساتتاعى ۇستانىمى ماڭىزدى بولىپ وتىر. اقش ەكونوميكاسىنا جەبەۋشى بولادى دەپ جورامالدانعان ترامپتى كوپتەگەن ساراپشىلار تەرىسكە شىعارىپ وتىر. مەيلى قالاي بولسا دا ترامپ 2017 جىلدى دابىرالى ساياسي ويىنمەن باستاپ وتىر.

“The Qazaq Times”