قىتاي ۇكىمەتى زاڭسىز تۇتقىندالعان ليۋ سيانىڭ قايدا ەكەنىن جاسىرىپ وتىر

نوبەل سىيلىعىنىڭ لاۋرەاتى ليۋ شياۋبونىڭ ايەلى ليۋ سيانىڭ امەريكالىق قورعاۋشىسى دجارەد سەنسەر بۇۇ-نىڭ زورلىقپەن جانە ەرىكسىز جوعالعان ازاماتتار تۋرالى جۇمىس توبىنا "ليۋ سيانىڭ زورلىقپەن ۇرلانعانى ءۇشىن جاۋاپكەرشىلىك - قىتاي ۇكىمەتىنىڭ موينىندا" دەگەن ماتىندەگى شاعىم جولدادى. بۇل تۋرالى ءال-جازيرا (Al-Jazeera) اقپاراتتىق اگەنتتىگى جازادى.

ليۋ سيا  كۇيەۋىنىڭ جەرلەۋ ءراسىمى ءوتىپ جاتقان 15 شىلدە كۇنى قىتايدىڭ قۇقىق قورعاۋ ورگاندارى قىزمەتكەرلەرىنىڭ قولىندا، بەلگىسىز جەردە بولعان. ءۇي قاماعىندا، ۇنەمى كۇزەتشىلەردىڭ ءجىتى قاداعالاۋىندا بولعان ول، ءتىپتى، جۇبايىنىڭ ءولىمى جونىندە دە ەشكىمگە حابارلاسىپ، ايتا الماعان.

دجارەد سەنسەر APF اقپاراتتىق اگەنتتىگىنە جولداعان جەكە مالىمدەمەسىندە قىتاي ۇكىمەتىنەن ليۋ سيانىڭ ءتىرى نە ءولى ەكەندىگى تۋرالى اشىق اقپارات تاراتۋىن جانە قولدى بولعان ازاماتشانى دەنساۋلىعىنا زارداپ كەلتىرىلمەگەن كۇيدە، جانۇياسى مەن قورعاۋشىسىنا قايتارۋىن تالاپ ەتتى.

ەستەرىڭىزگە سالا كەتەيىك، ليۋ شياۋبو قىتايدا كوپپارتيالىق جۇيە ورناعانىن قولدايتىن ەركىن ويلارى ءۇشىن 2009 جىلى 11 جىلعا تۇرمەگە جابىلعان بەلگىلى پۋبليتسيست، قۇقىق قورعاۋ قىزمەتكەرى. 2011 جىلى نوبەل سىيلىعىنىڭ  كوميتەتى ونى "قىتايداعى ادام قۇقىقتارى ءۇشىن جالعىز كۇرەسكەر"  دەپ تاۋىپ، وعان بەيبىتشىلىك ورناتۋ جولىنداعى ەڭبەگى ءۇشىن بەرىلەتىن جۇلدەنى سىرتتاي تابىستادى. ويتكەنى بۇل ارەكەتى ءۇشىن نوبەل سىيلىعىنىڭ كوميتەتىن قاتاڭ سىنعا العان قىتاي ۇكىمەتى جولدانعان رەسمي حاتتار مەن وتىنىشتەرگە قاراماستان، ونى ماراپاتتاۋ راسىمىنە جىبەرگەن جوق.  سول ۋاقىتتان بەرى ونىڭ ايەلى ليۋ سيا دا، ەشقانداي ايىپ تاعىلماستان، ءۇي قاماعىنا الىنعان.

وسى جىلى قازا تاپقان  ليا شياۋبو ولىمىنەن ءبىر اي بۇرىن، باۋىر قاتەرلى ىسىگىنىڭ اسقىنۋىنا بايلانىستى تۇرمەدەن اۋرۋحاناعا اۋىستىرىلعان بولاتىن. ول  - 1938 جىلى گەنوتسيد كەزىندە سولاقاي ساياساتتىڭ قۇربانى بولعان پاتسيفيست كارل فون وسەتسكيدەن كەيىنگى تۇتقىن بولىپ كوز جۇمعان تاعى ءبىر تۇلعا.

اتاپ ءوتۋ كەرەك، بۇۇ، اقش، ەۋرووداقتىڭ وسىدان بۇرىن قىتاي ۇكىمەتىن ليۋ سيانى بوساتۋعا شاقىرعان ۇندەۋلەرى جاۋاپسىز قالدى.

“The Qazaq Times”