فوتو; CNN

ۆەنەسۋەلادا  وتكەن ءتۇنى  وپپوزيتسيا جەتەكشىلەرى لەوپولدو لوپەس پەن انتونيو لەدەسمانى مەملەكەتتىك بارلاۋ قىزمەتىنىڭ كولىگىندە كەلگەن بەتىن بۇركەمەلەپ العان ادامدار بەلگىسىز باعىتتا الىپ كەتكەن. بۇل تۋرالى قولعا تۇسكەن وپپوزيتسيونەرلەردىڭ وتباسى مۇشەلەرى وزدەرىنىڭ تۆيتتەر پاراقشالارىنا جاريالاعان بەينەجازبالارىندا مالىمدەدى. CNN اقپاراتتىق اگەنتتىگىنىڭ جۋرناليستەرى وقيعاعا تالداۋ جاساپ، ەكى ازاماتتىڭ نەگە ايىپتى بولعانىن انىقتاۋعا تىرىستى. 

وتكەن جەكسەنبىدە ۆەنەسۋەلادا حالىق پەن بيلىك اراسىنداعى قارسىلىققا نەگىز بولعان سايلاۋ ءوتتى. 10-عا جۋىق ادامنىڭ ءومىرىن قيعان قاقتىعىستارعا قاراماستان، ۇلتتىق اسسامبلەيانىڭ ورنىنا ەل پرەزيدەنتى نيكولاس مادۋرونىڭ جاقتاستارىنان قۇرالعان، 545 ادامنان تۇراتىن قۇرىلتاي جينالىسى سايلاندى. ونىڭ مىندەتى - ۆەنەسۋەلانىڭ كونستيتۋتسياسىنا وزگەرىستەر ەنگىزۋ. ودان بولەك، نيكولاس مادۋرونىڭ ساياسي قارسىلاستارىن قۋدالايتىن "اقيقات ورناتۋشى كوميسسيا" جۇمىسىن باستايدى. بۇل جاڭاشىلدىقتارعا قارسىلىق تانىتقان حالىق سايلاۋدى بولدىرماۋ ءۇشىن، اعىمداعى جىلدىڭ ءساۋىر ايىنان باستاپ كۇرەسىپ كەلەدى. تولاسسىز جۇرگەن كوتەرىلىستەر ناتيجەسىندە وسى ۋاقىتقا دەيىن 125-كە جۋىق ادام كوز جۇمعان. جۋىردا وتكەن سايلاۋدىڭ قورىتىندىلارىنا كۇمان كەلتىرىپ، ونى "جالعان" دەپ ەسەپتەيتىن ۆەنەسۋەلانىڭ باس پروكۋرورى نيكولاس مادۋرو جاريالاعان "جەڭىس دەكلاراتسياسىنا": "بۇل - ءسوز بوستاندىعىنىڭ اياقتالۋى" دەگەن پىكىر ءبىلدىردى.

وپپوزيتسيا جەتەكشىلەرىنىڭ ايەلدەرى ولاردىڭ ءومىرى مەن دەنساۋلىعىنا نەندەي ءبىر زارداپ كەلسە، كىناسى  ۇكىمەتتىڭ موينىندا بولادى دەپ، ازاماتتارىنىڭ مەملەكەت باسشىسىنا قارسى ارەكەتى ءۇشىن ۇستالعاندارىنا سەنىمدى.

لەوپول لوپەس ۆەنەسۋەلانىڭ ءبىرىنشى پرەزيدەنتى كريستوبال مەندوسانىڭ ۇرپاعى. بيلىك باسىنداعى سوتسياليستەرگە قارسىلىعى ءۇشىن، 2008 جىلى "جەمقورلىق جاسادى" دەگەن ايىپپەن قىزمەتىنەن بوساعان. 2011 جىلى حالىقارالىق ادام قۇقىقتارى جونىندەگى سوت ونى اقتاعانىمەن، ۆەنەسۋەلاداعى تاعىلعان ايىپتان ارىلا المادى. 2014 جىلى بيلىككە قارسى شەرۋ كەزىندە قازا تاپقان 3 ادامنىڭ ولىمىنە كىنالى دەپ تابىلىپ، 2015 جىلى 14 جىلعا باس بوستاندىعىنان ايىرىلعان. وسى جىلدىڭ شىلدە ايىنان باستاپ، جازاسى ءۇي قاماعىنا اۋىرىستىرىلعان بولاتىن. وسىدان ەكى اپتا بۇرىن تۇسىرگەن بەينەجازباسىندا ول جەرگىلىكتى حالىقتى مەملەكەتكە قارسى كۇرەسىن توقتاتپاۋعا شاقىرادى.

ءوزىنىڭ وپپوزيتسيالىق جولىن 2008 جىلدارى باستاعان انتونيو لەدەسما كوپ ۋاقىت بويى كاراكاستىڭ مايورى قىزمەتىن اتقارعان. ەلدىڭ ەسىندە ونىڭ بۇرىنعى پرەزيدەنت ۋگو چاۆەستىڭ ساياساتىنا قارسى اشتىق جاريالاعان اكتسياسى جاقسى ساقتالعان.

اقش دەموكراتيالىق پرينتسيپتەرگە قايشى ارەكەت ەتكەنى ءۇشىن، ۆەنەسۋەلا پرەزيدەنتى نيكولاس مادۋروعا قارسى سانكتسيالار جاريالاپ، ونىڭ امەريكا قۇزىرەتىنە كىرەتىن اكتيۆتەرىن تولىقتاي شەكتەپ تاستادى.

“The Qazaq Times”