شىلدە ايىندا مىندەتتى الەۋمەتتىك مەديتسينالىق ساقتاندىرۋ جۇيەسى بويىنشا 0,8 ملرد تەڭگە كولەمىندە جارنا ءتۇستى. بۇل تۋرالى قر دەنساۋلىق ساقتاۋ ءمينيسترى ەلجان ءبىرتانوۆ ۇلت جوسپارىنىڭ 80 قادامىن ىسكە اسىرۋعا باعىتتالعان «مىندەتتى الەۋمەتتىك مەديتسينالىق ساقتاندىرۋدى ەنگىزۋ» تۋرالى قر ۇكىمەتىندە وتكەن بريفينگتە  مالىمدەدى.       

ۆەدومستۆا باسشىسىنىڭ ايتۋىنشا، بولجام بويىنشا 2017 جىلى 23 ملرد تەڭگە كولەمىندە مىندەتتى ساقتاندىرۋ جارناسى ءتۇسۋى ءتيىس. ونىڭ 95% جۇمىس بەرۋشىلەردىڭ اۋدارىمدارى بولسا، 5% جارنالارعا تيەسىلى بولماق.

الەۋمەتتىك مەديتسينالىق ساقتاندىرۋ قورىنىڭ مالىمەتى بويىنشا، 2017 جىلدىڭ شىلدەسىندە جۇيەگە تۇسكەن قارجى كولەمى 800 ملن تەڭگەگە جۋىقتاعان.

تۇسىمدەردىڭ باسىم بولىگى ياعني 44% وسى جىلدىڭ ءىى جارتىجىلدىعىنداعى اۆانستىق تولەمدەرى ەسەبىنەن جينالعان.

اۋدارىمدار مەن جارنالاردى تولەۋ بويىنشا الدىڭعى ورىندا شىعىس قازاقستان، قاراعاندى، قوستاناي جانە الماتى وبلىستارى تۇر.

ايتا كەتەيىك،  مىندەتتى الەۋمەتتىك مەديتسينالىق ساقتاندىرۋ جۇيەسى 2017 جىلدىڭ 1 شىلدەسىنەن باستاپ ىسكە قوسىلعان بولاتىن. بيىل اۋدارىمدار مەن جارنالاردى جۇمىس بەرۋشىلەر، جەكە كاسىپكەرلەر مەن ازاماتتىق-قۇقىقتىق سيپاتتاعى كەلىسىمشارت نەگىزىندە ەڭبەك ەتەتىن ازاماتتار تولەيدى.

وسى نورماعا سايكەس، جۇمىس بەرۋشى اي سايىن قاراماعىنداعى جۇمىسكەر جالاقىسىنىڭ 1% كولەمىندە اۋدارىم اۋدارادى. بىراق اۋدارىم سوماسى 3668,9 مىڭ تەڭگەدەن اسپاۋى ءتيىس (بۇل – 15 تومەنگى ايلىق جالاقىنىڭ 1%).

جەكە كاسىپكەرلەر مەن وسى ساناتقا جاتقىزىلعان جەكە مەنشىك ادۆوكاتتار جانە نوتاريۋستار، كاسىبي مەدياتورلار دا جارنانى 2017 جىلدىڭ 1 شىلدەسىنەن باستاپ اۋدارادى. بۇل ساناتتاعىلار جارناسى 2 تومەنگى ايلىق جالاقىنىڭ 5 پايىزىن نەمەسە 2017 جىل ءۇشىن 2445,9 تەڭگەنى قۇراماق. سونىمەن قاتار جەكە كاسىپكەرلەر قاراماعىنداعى جۇمىسكەرلەر ءۇشىن جۇمىس بەرۋشى رەتىندە جارنا اۋدارادى.

سونىمەن قاتار، 1-شىلدەدەن باستاپ ازاماتتىق-قۇقىقتىق كەلىسىمشارت نەگىزىندە ەڭبەك ەتەتىن جۇمىسكەرلەر دە جارنا اۋدارۋعا مىندەتتى. بۇل توپ تاپقان تابىسىنىڭ 5 پايىزى كولەمىندە جارنا اۋدارادى. دەگەنمەن اتالعان ساناتتاعى ازاماتتاردىڭ جارنا ەسەپتەلەتىن تابىسىنىڭ ەڭ جوعارعى مولشەرى 15 تومەنگى ايلىق جالاقىدان اسپاۋى ءتيىس.

سونداي-اق، 2018 جىلدىڭ 1 قاڭتارىنان باستاپ ساقتاندىرۋ جۇيەسىنە مەملەكەت پەن ءوزىن-ءوزى جۇمىسپەن قامتىعاندار قوسىلادى. مەملەكەت جەڭىلدىگى بار 14 ساناتتاعى 10 ملن ازامات ءۇشىن جارنا تولەيدى.اتاپ ايتقاندا، ءمامس جۇيەسىندە تەگىن ساقتاندىرىلاندار بالالار، زەينەتكەرلەر، مۇگەدەكتەر، جۇمىسسىز رەتىندە رەسمي تىركەلگەندەر جانە ت.ب.

ساقتاندىرىلعان ازاماتتار ءمامس پاكەتى شەڭبەرىندەگى مەديتسينالىق كومەكتى 2018 جىلدان باستاپ پايدالانا الادى. سول كەزگە دەيىن جەكەمەنشىك كلينيكالارمەن جانە مەملەكەتتىك ەمدەۋ مەكەمەلەرىمەن مەديتسينالىق قىزمەت كورسەتۋ تۋرالى كەلىسىمشارتتار بەكىتىلىپ ءبىتۋى ءتيىس.

“The Qazaq Times”