فوتو: Reuters

كەنيادا اعىمداعى جىلدىڭ 8 تامىزىندا  پرەزيدەنتتىك سايلاۋ وتەدى. قازىر ەلدەگى تۇتىنۋ تاۋارلارى جارناماسىنىڭ ورنىن پرەزيدەنتتىك سايلاۋ كانديداتتارىنىڭ ەسىمى جازىلعان ۇگىت-ناسيحات پاراقشالارى الماستىرعان. سايلاۋعا تۇسەتىن كانديداتتىڭ ارقايسىسى ەلەكتروندى تىركەۋدەن وتكەن 19 ملن ازاماتتاردىڭ داۋىسىنا يە بولعىسى كەلەدى.

بيىلعى سايلاۋ 45 ميلليون حالقى بار مەملەكەت 1992 جىلى دەموكراتيالىق جۇيەگە وتكەلى 8-ءشى رەت وتكەلى وتىر. حالىقارالىق ساراپشىلار الداعى سايلاۋدىڭ ناتيجەسى كەنيالىقتاردان بولەك، بۇكىل افريكا قۇرلىعى مەن الەمدى تولعاندىرىپ وتىر دەپ ەسەپتەيدى. سەبەبى...

"ەكونوميكالىق حاب"

بۇكىلالەمدىك بانكتىڭ دەرەگىنە سايكەس، نايروبي - شىعىس افريكانىڭ ەكونوميكالىق حابى سانالادى، ال كەنيا وڭىردەگى ەكىنشى ەڭ ءىرى ەكونوميكاعا يە مەملەكەت. 2014 جىلى كورشىلەس ەفيوپيادا ەرەكشە ەكونوميكالىق ءوسىم ورىن العانعا دەيىن، كەنيا شىعىس افريكاداعى جىلىنا 60 ملرد دوللاردى قۇرايتىن كولەمدى ءجىو-گە يە بولدى. نايروبي ۋنيۆەرسيتەتىنىڭ ەكونوميستى سامۋەل نيادەمو: "كەنيا ءوزىنىڭ كورشىلەرىمەن سالىستىرعاندا، شەتەلدىك ينۆەستورلاردى قۇشاق جايا قارسى الدى. كوپ جىلدار بويى بۇل مەملەكەت ەكونوميكاسى جەدەل قارقىنمەن ءوسىپ وتىرعان ەل بولدى",  - دەيدى.

حالىقارالىق قىلمىستىق سوت

كەنيادا وتەتىن پرەزيدەنتتىك سايلاۋ گااگاداعى حالىقارالىق قىلمىستىق سوت پەن ەۋروپا قۇرلىعى حالقىنىڭ ءجىتى نازارىندا بولادى. سەبەبى 2007 جىلى وتكەن پرەزيدەنتتىك سايلاۋدا سول كەزدەگى  مەملەكەت باسشىسى مۆاي كيۆاكي قايتا جەڭىسكە جەتىپ، جەڭىلىس تاپقان رايل ودينگ باستاعان وپپوزيتسيا تاراپى بيلىككە قارسى شەرۋلەر ۇيىمداستىرعان بولاتىن. ساياسي داعدارىستىڭ سوڭى كيكۋيۋ جانە كالەني تايپالارى اراسىنداعى ۇلتارالىق قاقتىعىسقا ۇلاسىپ، 1300-گە جۋىق بەيبىت تۇرعىن قازا تاپقان. 2014 جىلى قازىرگى پرەزيدەنت ۋحۋرۋ كەنياتا مەن ونىڭ پرەمەر-ءمينيسترى ۋيليام رۋتو 2007 جىلعى قاقتىعىستاردى ۇيىمداستىردى دەگەن ايىپپەن گااگاداعى حالىقارالىق قىلمىستىق سوتقا تارتىلدى. سول كەزدە سايلاۋدا ورىن العان ادىلەتسىزدىكتەر قايتالانباس ءۇشىن جانە حالىق اراسىنداعى بەيبىتشىلىكتىڭ بۇزىلماۋى ءۇشىن الەمدىك قاۋىمداستىق بۇل ساياسي وقيعانى اسىعا كۇتىپ، ەرەكشە باقىلاۋدا ۇستايتىن بولادى.

گۋمانيتارلىق ۇيىمدار

كەنيادا بىرنەشە وڭتۇستىك سۋدان، كونگو دەموكراتيالىق رەسپۋبليكاسى، سومالي مەملەكەتتەرىندە جۇمىس ىستەيتىن حالىقارالىق قايىرىمدىلىق قورلارى  جانە بوسقىندارعا ارنالعان ءىرى لاگەرلەر ورنالاسقان. مۇنداعى ءبىر عانا كاكۋما لاگەرىندە 160 مىڭعا جۋىق بوسقىن بار. ەگەر سايلاۋدان سوڭ، ەل ىشىندە قاقتىعىستار باستالىپ كەتسە، بۇل ءوز ەلىندەگى سوعىستاردان قاشىپ كەلگەن بوسقىندارعا اۋىر سوققى بولادى. ونان بولەك،  گۋمانيتارلىق كومەكتى قاجەت ەتەتىن كورشىلەس ەلدەردىڭ ازىق-تۇلىك قورى نايروبيدە ورنالاسقاندىقتان، ولارعا جەتكىزىلەتىن كومەكتىڭ  كەشىكپەۋى دە كەنيانىڭ تىنىشتىعىنا بايلانىستى.

“The Qazaq Times”