اقش-تىڭ ەكونوميكا مەن ساۋدا وكىلدەرى قىتايعا ساپارلاي بارادى

اقش پرەزيدەنتى دونالد ترامپ ەلىنە ساپارلاي كەلگەن فرانتسيا پرەزيدەنتى ماكرونمەن كەزدەسۋ كەزىندە اقش-تىڭ ەكونوميكا مەن سىرتقى ساياساتتاعى بىرقاتار ۇستانىمدارىن اشىق ورتاعا سالدى. سونىڭ ءبىرى – اقش-قىتاي اراسىنداعى ساۋدا قاقتىعىسى. ترامپ كەشەگى مالىمدەمەسىندە، قارجى ءمينيسترى باستاعان ەكونوميكا-ساۋدا وكىلدەرى مەن كەڭەسشىلەرى كەلەسى اپتادا قىتايعا ساپارلاي باراتىنىن جەتكىزدى. بۇل تۋرالى VOA اقپاراتتىق سايتى حابارلاعان بولاتىن.

ترامپ اقش پەن قىتاي اراسىنداعى بۇل جاڭا كەلىسسوزدەن ۇلكەن ءۇمىت كۇتەتىنىن ءبىلدىردى. اقش قارجى ءمينيسترى نۋچين باستاعان جوعارى لاۋازىمدىلار بەيجىڭ ساپارىندا ەكى ەل اراسىنداعى ساۋدا داۋىن شەشىپ، جاڭا كەلىسىمگە كەلەدى دەپ كۇتىلۋدە. دەگەنمەن، ترامپ ماكرونمەن كەزدەسۋ كەزىندە قىتاي ۇكىمەتىنە قاراتا ەسكەرتۋ جاساپ، ەگەر قىتاي تارابى اشىق ساۋدا قارىم-قاتىناسىن جولعا قويماسا، قۇراما شتات قىتايلىق تاۋارلارعا قۇنى 150 ملرد دوللار كولەمىندە قوسىمشا كەدەن باجى سالىعىن ەنگىزەتىنىن اتاپ ءوتتى.

ترامپ ءسوز اراسىندا قىتاي باسشىسى شي ءجينپيڭدى (سي تسزينپين/Xi Jinping) «دوسىم» دەپ اتاپ، ونىڭ سوڭعى جاڭا ەكونوميكالىق ساياساتىنداعى شەتەلدىك كومپانيالارعا جاساعان جەڭىلدىكتەرى مەن شەتەلدىك نارىققا اشىق ساياساتىنا وڭ باعاسىن بەردى. ول سوزىندە: «ءبىز كەلىسىمگە كەلەر بولساق، ەكى ەلدىڭ بىرگە جەتەتىن مۇمكىندىكتەرى وتە كوپ. بىراق، ولار ءالى دە كەدەرگىلەردى الىپ تاستاماي وتىر»، – دەدى.

“The Qazaq Times”