«نۇرلى جەر» باعدارلاماسى اياسىندا جاڭا تۇرعىن ءۇيدى ساتىپ العان كەزدە حالىق ءۇشىن يپوتەكانىڭ نارىقتىق مولشەرلەمەسىن تومەندەتۋ ماقساتىندا يپوتەكالىق قارىزداردى سۋبسيديالاۋعا ۇلتتىق قوردان 10 ملرد تەڭگە بولىندى، دەپ حابارلايدى قر ينۆەستيتسيالار جانە دامۋ مينيسترلىگىنىڭ ءباسپاسوز قىزمەتى. 

«رەسپۋبليكانىڭ 6 ايماعىندا  (استانا مەن الماتى قالالارى، باتىس قازاقستان، ماڭعىستاۋ، شىعىس قازاقستان، اقمولا وبلىستارى) جاڭا تۇرعىن ءۇي ساتىپ الۋ ءۇشىن حالىققا جەڭىلدىكپەن يپوتەكا بەرۋ باستالدى. بۇگىنگى كۇنى 7 ەكىنشى دەڭگەيلى بانك (سبەربانك، اتفبانك، بانكتسەنتركرەديت، BankRBK, تەنگري بانك، «جسسبك» اق، تسەسنابانك) باعدارلاماعا قاتىسۋعا دايىن. ونىڭ ىشىندە 4 ەكىنشى دەڭگەيلى بانك 30 ملرد تەڭگە (جوسپار 120 ملرد. تەڭگە) سوماسىندا 2 مىڭ (جوسپار 8 مىڭ) قارىز بەرۋدى بولجاپ وتىر»،-دەدى قر ينۆەستيتسيالار جانە دامۋ ءمينيسترى جەڭىس قاسىمبەك قازاقستان رەسپۋبليكاسى ۇكىمەتىنىڭ وتىرىسىندا.

باعدارلامانىڭ ءتورتىنشى باعىتى بويىنشا (جەكە قۇرىلىس سالۋشىلاردى تۇرعىن ءۇي سالۋعا ىنتالاندىرۋ) قۇرىلىس سالۋشىلاردىڭ كرەديتتەرىن سۋبسيديالاۋ ءۇشىن ۇلتتىق قوردان تاعى 11 ملرد تەڭگە ءبولىندى.

«ەكىنشى دەڭگەيلى بانكتەر (سبەربانك، اتف بانك، بانكتسەنتركرەديت، تەنگريبانك، تسەسنابانك، نۇربانك، ەۆرازيالىق بانك) كرەديت بەرۋ ءۇشىن قۇرىلىس سالۋشىلاردىڭ 17 جوباسىن قاراپ جاتىر. قارىز 53,6 ملرد تەڭگەنى قۇرايدى. 2018-2019 جىلدارى وسى جوبالاردى ىسكە اسىرۋ ەسەبىنەن  282 مىڭ شارشى مەتر تۇرعىن ءۇيدى (403 مىڭ پاتەردىڭ 70%-ى) پايدالانۋعا بەرۋ جوسپارلانىپ وتىر. جوبا 8 وڭىردە (استانا مەن الماتى قالالارى، اقتوبە، اتىراۋ، جامبىل، وڭتۇستىك قازاقستان، قوستاناي، باتىس قازاقستان وبلىستارى) ىسكە اسىرىلىپ جاتىر»،-دەدى ۆەدومستۆو باسشىسى.

ايتا كەتەيىك، قر پرەزيدەنتى نۇرسۇلتان نازارباەۆ جىل سايىنعى ءداستۇرلى جولداۋىندا "ۇلتتىق قور قاراجاتىن پايدالانۋعا ۇتىمدىلىق تۇرعىسىنان قاراعان ءجون" دەگەن. ونىڭ سوزىنشە، ۇلتتىق قوردان الىنعان كەپىلدەندىرىلگەن ترانسفەرت كولەمى 2020 جىلعا قاراي كەزەڭ-كەزەڭ بويىنشا 2 تريلليون تەڭگەگە قىسقارتىلۋعا ءتيىس.

“The Qazaq Times”