يەمەندە تىرىسقاق ىندەتى ءورشىپ تۇر

يەمەندە تىرىسقاق ىندەتى قۇرباندارىنىڭ رەسمي دەرەكتەردە كورسەتىلگەننەن ارتىق بولۋى مۇمكىن دەپ حابارلادى بۇۇ باس حاتشىسىنىڭ گۋمانيتارلىق ماسەلەلەر بويىنشا ورىنباسارى ستيۆەن و'برايەن.

بۇۇ مالىمەتىنشە، يەمەندە تىرىسقاق اۋرۋىنان 330 مىڭ ادام زارداپ شەگىپ، 1 مىڭ 740 ءولىم تىركەلگەن. بۇۇ قاۋىپسىزدىك كەڭەسىنىڭ وتىرىسىندا ستيۆەن و'برايەن : "بۇۇ وكىلدەرىنىڭ اياعى جەتپەي وتىرعان يەمەننىڭ شالعاي اۋداندارىن قوسا ەسەپتەسەك، بۇل كورسەتكىش بىرنەشە ەسەگە ارتۋى مۇمكىن. مەملەكەت بيلىگى مەن گۋمانيتارلىق كومەك ۇيىمدارىنىڭ قولىندا سۋدى تازارتۋ قۇرىلعىلارىنىڭ بولماۋى جاعدايدى ودان ءارى قيىنداتىپ وتىر", - دەدى.

يەمەندە 16 ميلليون ادام تازا اۋىز سۋعا قول جەتكىزە الماي وتىر. ەلدەگى اۋرۋحانالاردىڭ 55 پايىزى قارجىنىڭ جوقتىعىنان جابىلىپ قالعان. 30 مىڭعا جۋىق مەديتسينا قىزمەتكەرلەرى ءبىر جىل بويى جالاقى الماعان. 7 ميلليون حالىققا اشارشىلىق قاۋپى ءتونىپ تۇر.

دۇنيەجۇزىلىك دەنساۋلىق ساقتاۋ ۇيىمى ەلدەگى 23 پروۆينتسيانىڭ 21-ىندە تىرىسقاق اۋرۋى تارالعانىن ايتىپ، دابىل قاقتى.

يەمەندە 2014 جىلدان بەرى  بىر جاعىنان  "انسار اللا" شيتتىك قوزعالىسى، ەكىنشى تاراپتان الي ابداللا سالەحقا ادال اسكەردىڭ ءبىر بولىگى جانە ءۇشىنشى جاقتان ساۋد ارابياسىنىڭ كومەگىنە ارقا سۇيەگەن قازىرگى پرەزيدەنت ابد راببۋ مانسۋر ءحاديدىڭ توبى اراسىندا ۇشجاقتى سوعىس ءجۇرىپ جاتىر.

“The Qazaq Times”