فوتو: Reuters

سوت برازيليانىڭ ەكس-پرەزيدەنتى لۋيس يناسيو لۋلۋ دا سيلۆاعا جەمقورلىققا قاتىستى تاعىلعان ايىپتاۋلاردىڭ نەگىزدەمەسى بار دەپ تاۋىپ، ونى 9,5 جىلعا اباقتىعا جابۋ تۋرالى شەشىم شىعاردى.

ەكس-پرەزيدەنت پەن ونىڭ جارى گۋارۋجا شيپاجايىندا ورنالاسقان باعالى ءزاۋلىم ءۇيىن تابىس دەكلاراتسياسىنا ەنگىزبەي، جاسىرىن ۇستادى جانە Petroleo Brasileiro مەملەكەتتىك كومپانياسىمەن كەلىسىم شارت جاساسۋعا كومەكتەسكەن قىزمەتى ءۇشىن OAS قۇرىلىس كومپانياسىنان 747,8 مىڭ اقش دوللارى كولەمىندە پارا الدى دەپ ايىپتالعان بولاتىن.

لۋيس يناسيو لۋلۋ دا سيلۆانىڭ قورعاۋشىلارى سوتتىڭ شەشىمىن اپپەلياتسياعا بەردى. ەندى ءىس قايتا قارالعانشا، ەكس-پرەزيدەنت بوستاندىقتا جۇرەتىن بولدى.

اتاپ ءوتۋ كەرەك، 2003-2011 جىلدار ارالىعىندا  برازيليانىڭ مەملەكەت باسشىسى قىزمەتىندە  بولعان لۋيس يناسيو لۋلۋ دا سيلۆانىڭ تۇسىندا ەلدەگى كەدەيلىك دەڭگەيى 50 پايىزعا دەيىن قىسقارىپ، الەۋمەتتىك  جاعدايى تومەن جانۇيالارعا بالالارى مىندەتتى تۇردە مەكتەپكە بارىپ، مەديتسينالىق ەكپەلەردى ۋاقىتىلى قابىلداۋى كەرەك دەگەن تالاپپەن اي سايىن بەرىلەتىن جاردەماقى بەلگىلەندى. سونىمەن قاتار ءدال سول جىلدارى مەملەكەت ىشىندە جەمقورلىقپەن بايلانىستى ساياسي جانجالدار كوپتەپ ورىن العانىن دە ەسكەرتىپ وتكەن ءجون.

بۇرىن ەندى پرەزيدەنتتىك سايلاۋعا تۇسپەيمىن دەپ مالىمدەگەن لۋيس يناسيو لۋلۋ دا سيلۆا مىنا داۋلى وقيعادان كەيىن،  2018 جىلى باعىن قايتا سىناپ كورۋگە بەل بايلاپ وتىر. قازىر ەلدەگى پرەزيدەنتتىككە ۇمىتكەر وزگە تۇلعالارمەن سالىستىرعاندا، ەكس-پرەزيدەنتتىڭ قولداۋشىلارى كوپ.

“The Qazaq Times”