تەرگەۋشىلەر پسيحو جانە ناركوديسپانسەرلەردىڭ بازاسىنا قوسىلا الاتىن بولدى

قر باس پروكۋراتۋراسىنىڭ قۇقىقتىق ستاتيستيكا جانە ارنايى ەسەپ كوميتەتىنىڭ باسشىسى باعدات مۋسين ءوزىنىڭ Facebook پاراقشاسىندا قۇقىق قورعاۋ ورگاندارىنىڭ جەلىلىك جۇيەسى ەندى  پسيحو، ناركوديسپانسەرلەردىڭ بازاسىنا قوسىلا الاتىن بولدى دەپ حابارلادى.

«ەندى ەلىمىزدىڭ بارلىق تەرگەۋشىلەرى ارنايى دەرەك قاجەت بولعان جاعدايدا پسيحو، ناركوديسپانسەرلەرگە ءوتىنىم جولداپ، قاعاز جۇزىندە اقپارات الىپ، ۋاقىت جوعالتپايدى. جۇمىس ورنىندا وتىرىپ-اق، كومپيۋتەرى ارقىلى دەرەكتەر بازاسىنان كەرەكتى مالىمەتىنە قول جەتكىزە الادى»، - دەپ جازدى كوميتەت باسشىسى.

وتكەن جىلى ازاماتتار جونىندە  وسىنداي مەكەمەلەردەن انىقتاما الۋدى قاجەت ەتەتىن 120 مىڭ جاعداي تىركەلگەن. ەندى جاڭا جۇيە قۇقىق قورعاۋ ورگانى قىزمەتكەرلەرىنىڭ جوعارىدا اتالعان مەكەمەلەرگە وسىنشا رەت بارىپ-كەلۋىن قىسقارتادى. پسيحو، ناركوديسپانسەرلەردە كەيدە انىقتاما بىردەن دايىن بولمايدى. مۇندايدا ونى الۋ ءۇشىن ەكىنشى، نە ءۇشىنشى رەت بارۋعا تۋرا كەلەتىن. ەندى بۇل ۋاقىتتا تەرگەۋشى باسقا ماڭىزدى جۇمىستارمەن اينالىسا الادى.

باعدات مۋسين ارنايى ەسەپ ورتالىعىنا بارىپ كەلۋ شىعىنى مەن وعان جۇمسالاتىن ۋاقىتقا دەيىن ەسەپتەپ جازعان. سونىمەن، كوميتەت باسشىسىنىڭ مالىمەتىنشە، ءار انىقتاما ءۇشىن مەملەكەت شامامەن، 3 مىڭ 262 تەڭگە جۇمسايدى دەسەك، بۇل بيۋدجەتكە جىلىنا 400 ملن تەڭگە شىعىن الىپ كەلەدى. ءدال وسىلاي وتكەن جىلى ورىن العان 120 مىڭ ءىستىڭ قاعازىن الۋعا ارقايسىسىنا  2 ساعات كولەمىندە ۋاقىت جۇمسالسا، بۇگىنگى جاڭا جۇيە 240 مىڭ ساعاتتى ۇنەمدەۋگە كومەكتەسەتىن كورىنەدى.

ال ەندى بۇل جۇيە تەك تەرگەۋشىلەر ءۇشىن عانا ەمەس، جەكە تۇلعالار ءۇشىن دە ەنگىزىلسە قۇبا قۇپ بولار ەدى. سەبەبى قازىرگى كەزدە جۇمىسقا تۇرۋ كەزىندە ازاماتتاردىڭ كوپشىلىگى پسيحو جانە ناركوديسپانسەردەن انىقتاما الۋ ءۇشىن بىرنەشە ساعات كەزەكتە تۇرۋىنا تۋرا كەلەدى.

“The Qazaq Times”