امەريكالىق وقۋشى پەنتاگوننىڭ باسشىسىنان سۇحبات الدى

تەددي فيشەر ەسىمدى امەريكالىق وقۋشى اقش-تىڭ قورعانىس ءمينيسترى دجەيمس مەتتيستىڭ تەلەفون نومەرىن تاۋىپ، ونىمەن كەزدەسۋگە ءسوز بايلاسىپ، 45 مينۋتتىق سۇحبات الدى دەپ حابارلايدى  New York Post.

ۆاشينگتوندا تۇراتىن وقۋشى ءمينيستردىڭ تەلەفون نومەرىن «Washington Post» گازەتىنىڭ 11 مامىرداعى سانىنان كورىپ قالعان. ەشكىم ءمان بەرمەگەن فوتوسۋرەتتە اقش پرەزيدەنتى دونالد ترامپتىڭ وققاعارلارىنىڭ ءبىرى كيت شيللەردىڭ قولىنداعى قاعازداردىڭ بەتىندە قورعانىس ءمينيسترىنىڭ اتى مەن نومەرى جازىلعان. كوپ ۇزاماي سۋرەت سايتتان وشىرىلگەنىمەن، جاس جەتكىنشەك نومەردى جاتتاپ ۇلگەرىپ، دجەيمس مەتتيسكە حابارلاسقان.

اقش-تىڭ قورعانىس ءمينيسترى جاس وقۋشىلارعا كومەكتەسۋگە، وي بولىسۋگە قاشاندا دايىن ەكەندىگىن ءبىلدىردى. سۇحبات بارىسىندا 11 جاسار تەددي فيشەر الەمدەگى ماڭىزدى ساياسي وقيعالاردى ەركىن تالقىلاپ، ءمينيستردىڭ ويىن سۇرادى. سونداي-اق، «ەگەر اقش اۋعانىستان مەن سيرياداعى بالالاردىڭ امەريكا مەكتەپتەرىندە وقۋىنا جاعداي جاساپ، اقشاسىن  تولەپ بەرسە، راديكالدى اعىمدارمەن كۇرەسكە قىرۋار قارجى جۇمساماي-اق قويۋعا بولار ەدى. ادامدارعا جاقسى ءومىر مەن ءبىلىم بەرۋ ارقىلى كوپ قيىندىقتان قۇتىلۋعا، ويلارىن جاقسى باعىتقا وزگەرتۋگە بولادى» دەگەن ويىمەن ءبولىستى. ونىڭ سۇحباتى ءوزى وقيتىن مەكتەپتىڭ باسىلىمىندا جاريالاندى.

“The Qazaq Times”