اقش قورعانىس قابىلەتىن ارتتىرۋعا كۇش سالادى

اقش قورعانىس قابىلەتىن ارتتىرۋعا كۇش سالادى. بۇل تۋرالى امەريكانىڭ  جاڭادان جاريالانعان ۇلتتىق قورعانىس ستراتەگياسىندا ايتىلدى. اقش-تىڭ قورعانىس ءمينيسترى دجەيمس مەتتيستىڭ حاباررلاۋىنشا، مەملەكەت ەندى سىرتقى ساياساتىندا تەرروريزممەن كۇرەسكە ەمەس، الەمدەگى رەسەي مەن قىتاي سياقتى الىپ دەرجاۆالارمەن باسەكەدە ءوز ارتىقشىلىقتارىن قالىپتاستىرۋعا باسا نازار اۋداراتىن بولادى. بۇل تۋرالى ۆۆس اقپاراتتىق اگەنتتىگى جازدى. 

اقش پرەزيدەنتى دونالد ترامپ جاڭا ستراتەگيا اياسىندا قاراستىرىلعان بيۋدجەتكە وزگەرىستەر ەنگىزىپ، قورعانىس سالاسىنا بولىنەتىن قاراجات 10 پايىزعا وسەتىنىن مالىمدەدى. بۇل - 54 ملرد $ اينالاسىنداعى قاراجات. وتكەن جىلمەن سالىستىرعاندا ارتا تۇسكەن بيۋدجەتتەگى ۇستەمە قارجى شەت ەلگە بەرىلەتىن ءارتۇرلى كومەكتەردىڭ بىرقاتارىن قىسقارتۋ ارقىلى ۇنەمدەلەتىن بولادى.

دجەيمس مەتتيستىڭ ايتۋىنشا، اقش-تىڭ اسكەري سالاداعى باسىمدىعى كۇن ساناپ قاتاردان قالىپ كەلەدى. ول بۇل ولقىلىقتىڭ ورنىن تولتىرۋ ءۇشىن جاڭا تەحنولوگيالار مەن زاماناۋي قۇرال-جابدىقتارعا ينۆەستيتسيا سالۋ ارقىلى  اۋە، قۇرلىق، تەڭىز جانە كيبەر قاۋىپسىزدىك سالالارىنداعى تەحنيكالىق الەۋەتتى ارتتىرۋ قاجەتتىلىگىن دە اتاپ ءوتتى. "بىراق بۇل بۇرىنعىدان كوپ اقشا ءبولۋدى ەمەس، قولدا بار قاراجاتتى ءتيىمدى جۇمساۋ دەگەندى بىلدىرەدى", - دەدى ول.

“The Qazaq Times”