فوتو: كازينفورم

قازاقستان بانكتەرىنىڭ جاعدايى قيىنداي باستادى. وسى جىلدىڭ مامىر ايىندا تولەم مەرزىمى 90 كۇننەن اسىپ كەتكەن قارىزداردىڭ كولەمى بىردەن 39,5 پايىزعا كوبەيىپ، 1,7 ترلن تەڭگەنى قۇرادى، دەپ حابارلايدى Ranking.kz اگەنتتىگى. 

اگەنتتىكتىڭ مالىمەتىنشە، "ناشار" كرەديتتەردىڭ كولەمىنىڭ ءبىر ايدا بۇلاي جىلدام ءوسىپ كەتۋى  2008 جىلدان بەرى تىركەلمەگەن. بۇعان دەيىنگى رەكوردتى كورسەتكىش 2009 جىلدىڭ ءساۋىر ايىندا تىركەلگەن. بۇل جىلى تولەم مەرزىمى 90 كۇننەن اسىپ كەتكەن كرەديت 25,5پايىزعا ارتقان.

قازىرگى كەزدە جالپى قارىز پورتفەلىندەگى "ناشار" كرەديتتەردىڭ ۇلەسى 8 پايىزدان 11,1 پايىزعا دەيىن ارتقان.

ال ەكىنشى دەڭگەيلى بانكتەر ارقىلى بەرىلگەن كرەديت كولەمى جوعارعى ناتيجەگە يە بولىپ وتىرعان جوق. سەبەبى مامىر ايىندا بانكتەردىڭ قارىز پورتفەلى بار بولعانى 0,7 پايىزعا عانا كوبەيگەن. ءبىر جىل ىشىندە ەكونوميكاعا بەرىلگەن كرەديت كولەمى 1,6 پايىزعا وسسە، ال ناشار قارىزدار كولەمى 35,7 پايىزعا ءوسىپ كەتكەن.

نەگىزى قر بانكتەرىنىڭ كرەديتتىك پورتفەل جاعدايىنىڭ قيىنداۋىنا Delta Bank بالانسىنداعى 68,4 پايىز قارىزدىڭ ساپاسىز دەپ تانىلۋى اسەر ەتتى. ايتا كەتەيىك، ۇلتتىق بانك 2017 جىلدىڭ 21 ماۋسىمداعى قاۋلىسىنا سايكەس، "Delta Bank" اق-نىڭ جەكە جانە زاڭدى تۇلعالارعا شوت اشۋ، دەپوزيت قابىلداۋعا قاتىستى ليتسەنزياسىن 2017 جىلدىڭ 3 تامىزىنا دەيىن توقتاتا تۇرۋ تۋرالى شەشىم قابىلداعان.

 “The Qazaq Times”