فوتو: سپۋتنيك

وزبەكستان ميليتسياسى 1 تامىزدان باستاپ اقىلى قىزمەت تۇرىنە كوشەدى. بۇل جايىندا وزبەكستان مينيسترلەر كابينەتى ءوزىنىڭ رەسمي سايتىندا جاريالادى.

تامىز ايىنان باستاپ وزبەكستاندا قوعامدىق ورىنداردىڭ قاۋىپسىزدىگىن قامتاماسىز ەتكەنى ءۇشىن وزبەك ميليتسياسىن جەرگىلىكتى كاسىپكەرلەر قارجىلاندىراتىن بولادى. اتاپ ايتقاندا وزبەكستان ميليتسياسى ساياباقتاردىڭ، ويىن-ساۋىق ورتالىقتارىنىڭ، بازارلاردىڭ تىنىشتىعىن قامتاماسىز ەتكەنى ءۇشىن ولارعا كاسىپكەرلەر ءوز قالتاسىنان جالاقى تولەيدى.

زاڭ جوباسى ەل پرەزيدەنتى شاۆكات ميرزيەەۆتىڭ 12 ساۋىردە شىعارعان جارلىعى بويىنشا دايىندالعان.

بۇل دەگەنىمىز ەگەردە زاڭ جوباسى كۇشىنە ەنەتىن بولسا، ونسىزدا وزبەكستان حالقىنىڭ سالىعىنان تۇسكەن قارجىعا جالاقى الىپ كەلگەن ميليتسيونەرلەر ەندى جەكە كاسىپكەرلەردىڭ ەسەبىنەن دە جالاقى الاتىن بولادى دەگەن ءسوز.

قازىردىڭ وزىندە زاڭداعى بۇل وزگەرىس كۇشىنە ەنبەي جاتىپ تاشكەنت قالاسىنداعى بىرقاتار ساياباقتار اقىلى قىزمەتكە كوشكەن.

“The Qazaq Times”