فوتو: chuprina.kz

"قازاقستان حالىق بانكى" اق جانە "قازكوممەرتسبانك" اق بانكوماتتىق جەلىلەردى بىرىكتىرۋ جۇمىسىن باستادى. ەندى 10 شىلدەدەن باستاپ Halyk جانە Qazkom كارتالارىن ۇستاۋشىلار ءۇشىن بانكوماتتان قولما-قول اقشا الۋ كەزىندە قوسىمشا كوميسسيالاردىڭ الىنۋى توقتاتىلادى. بۇل تۋرالى حالىق بانكتىڭ ءباسپاسوز قىزمەتى حابارلايدى. 

2017 جىلعى 1 ماۋسىمداعى كورسەتكىش بويىنشا، حالىق بانكىنىڭ بانكوماتتار جەلىسى 2367 بىرلىكتى قۇرايدى، ونىڭ ىشىندە 559 بانكوماتتىڭ cash-in فۋنكتسياسى بار، ال قازكوممەرتسبانكتىڭ بانكوماتتار جەلىسىنىڭ سانى - 2292, ولاردىڭ 465-ىندە قولما-قول اقشا قابىلداۋ فۋنكتسياسى جابدىقتالعان.

ءباسپاسوز قىزمەتىنىڭ مالىمەتىنشە، حالىق بانك قازىرگى كەزدە 6 ملن كارتا ۇستاۋشىعا قىزمەت كورسەتەدى، ال قازكوممەرتسبانكتە – 2 ملن استام. قازاقستاننىڭ ەكونوميكالىق بەلسەندى ازاماتتارىنىڭ كوپشىلىگى ەكى بانكتىڭ بىرىكتىرگەن بانكوماتتار جەلىسىنىڭ ارتىقشىلىقتارىن پايدالانا الادى.

قولما-قولسىز تولەمدەر نارىعى بەلسەندى تۇردە دامىپ جاتقاندىعىنا قاراماستان، قاراجاتتى بانكومات ارقىلى قولما-قول اقشاعا اينالدىرۋ قازاقستانداعى ەڭ تانىمال بانكتىك وپەراتسيالاردىڭ ءبىرى. رەسمي ستاتيستيكا بويىنشا، تەك 2017 جىلعى ءساۋىر ايىندا عانا  قازاقستاندىقتار 683,2 ملرد تەڭگەگە وسى سىندى 17,6 ملن ترانزاكتسيانى جۇرگىزگەن.

 “The Qazaq Times”