قازاقستان بىرتىندەپ وپەك كەلىسىمىنەن شىعۋى مۇمكىن

قازاقستان مۇناي كولەمىن قىسقارتۋ تۋرالى وپەك كەلىسىمىنەن بىرتىندەپ باس تارتۋى مۇمكىن. بۇل تۋرالى قر ەنەرگەتيكا ءمينيسترى قانات بوزىمباەۆ مالىمدەدى، دەپ حابارلايدى تاسس.

مينيستر "قازاقستان بىرنەشە ايدا نەمەسە مۇناي باعاسىنىڭ وسۋىنە بايلانىستى وپەك كەلىسىمىنەن شىعۋى مۇمكىن بە؟" دەگەن سۇراققا ء"بىرىنشى نۇسقا", -  دەپ جاۋاپ بەرگەن.

سونداي-اق، ول استانا كەلىسىمدى ۇزارتۋعا قاتىستى ءوز پوزيتسياسىن ءالى ناقتىلاماعانىن اتاپ ءوتتى. "بۇل قاراشا ايىنا قاتىستى سۇراق", - دەيدى ول. ايتا كەتەيىك، وپەك-ءتىڭ كەزەكتى ءسامميتى قاراشا ايىندا بولادى.

ۆەدومستۆو باسشىسى قازاقستان وسى جىلى مۇناي وندىرۋگە قاتىستى جوسپاردى ارتىعىمەن ورىندالۋى مۇمكىن ەكەنىن دە ايتقان. "جىلدىق جوسپار 81 ملن توننا، بىراق بۇدان دا ارتىق بولادى دەپ ويلايمىن", - دەيدى ول.

ونىڭ سوزىنشە، رەسپۋبليكا مۇناي كولەمىن قىسقارتۋ كەلىسىمىن تولىق باقىلاۋعا الىپ وتىر. ول "مەملەكەت شارتتا كورسەتىلگەن پارامەتەرلەردى ورىنداي الدى ما" دەگەن ساۋالعا: "شامامەن", - دەپ جاۋاپ بەرگەن. ول مۇناي كولەمىنە قاتىستى حالىقارالىق ەنەرگەتيكا اگەنتتىگى مەن قازاقستاننىڭ ەنەرگەتيكا مينيسترلىگى ەسەبىنىڭ اراسىندا ءبىراز اۋىتقۋشىلىق بار ەكەنىن اتاپ ءوتتى.

ايتا كەتەيىك، وسى جىلدىڭ 25 مامىرىندا مۇناي ەكسپورتاۋشى ەلدەر ۇيىمى وپەك مۇناي ءوندىرىسىن قىسقارتۋ تۋرالى كەلىسىم مەرزىمىن ۇزارتقان. اۋستريانىڭ ۆەنا قالاسىندا وتكەن وتىرىس بارىسىندا ۇيىمعا مۇشە ەلدەر وسىنداي شەشىم قابىلداعان ەدى.

وسىدان سوڭ قازاقستاننىڭ ەنەرگەتيكا مينيسترلىگى وپەك پەن وعان مۇشە ەمەس ەلدەردىڭ مۇناي كولەمىن قىسقارتۋ مەرزىمىن ۇزارتۋ تۋرالى شەشىمىن قولدايتىنىن، بۇل باعانىڭ قالىپتى دەڭگەيىن ساقتاۋ ءۇشىن قاجەت ەكەنىن مالىمدەدى منيسترلىكتەن.

 “The Qazaq Times”