پولياك وفيتسەرلەرى جاپپاي ولتىرىلگەن ورىنعا كورمە قۇرىلادى

رەسەي ستاليننىڭ بۇيرىعىمەن اتىلعان پولياك وفيتسەرلەرى جەرلەنگەن كاتىن جەرىندە، قىزىل ارميا اسكەرلەرى ۇستالعان پولشانىڭ كونتسلاگەرلەرى تۋرالى كورمە ۇيىمداستىرماق. بۇل تۋرالى باستامانى "رەسەي اسكەري-تاريحي قوعامى" كوتەرىپ وتىر. 

پولياك جەرىندە 1920 جىلدارى جۇمىس ىستەگەن،  مىڭداعان اسكەريلەر كوز جۇمعان كونتسلاگەرلەردىڭ كورمەسىن قۇرۋ تۋرالى ءالى رەسمي شەشىم قابىلدانعان جوق. بىرقاتار ساراپشىلار بۇل باستامانى پولشانىڭ "كوممۋنيزمدى ناسيحاتتاۋعا تىيىم سالۋ تۋرالى" زاڭىنا سايكەس جۋىردا ەلدەگى 500-گە جۋىق كەڭەستىك ەسكەرتكىشتەردى الىپ تاستاۋ تۋرالى جارلىعىنا جاۋاپ دەپ باعالايدى.

ءدال وسى بۇيرىق قابىلدانعان كەزدە رەسەي مەملەكەتتىك دۋماسىنىڭ دەپۋتاتى نيكولاي حاريتونوۆ: "پولشا جەرىندە 600 مىڭ  كەڭەس اسكەرى جانقيارلىقپەن جان تاپسىرعان. ولارعا ارنالعان ەسكەرتكىشتەردى قۇلاتۋ - ۇلكەن قاتەلىك. پولشانىڭ بۇل ارەكەتى ءۇشىن رەسەي ونىمەن ديپلوماتيالىق قارىم-قاتىناسىن ءۇزىپ، ەلشىنى مەملەكەتكە قايتارىپ الۋى كەرەك", -دەپ ۇسىنىس بىلدىرگەن ەدى.

پولياك كوررەسپوندەنتى پشەمىسلاۆ ماجەتس رەسەيدەگى باستاماشىلداردىڭ پىكىرىن كاتىن وقيعاسىنداعى ءوز كىنالارىن جوققا شىعارۋعا تىرىسۋعا بالايدى. "رەسەي كاتىنداعى جاپپاي قىرىپ-جويۋ ارەكەتىن پولشا جەرىندە ازاپتالعان اسكەريلەر ءۇشىن جاسالعان جاۋاپ رەتىندە كورسەتكىسى كەلەدى، مۇنداي ناسيحاتتى رەسەيلىك تاريحشىلار ميحايل گورباچەۆتىڭ كوممۋنيستىك پارتيانىڭ حاتشىسى بولعان كەزىنەن باستاپ جۇرگىزىپ كەلەدى", - دەيدى.

كاتىن - پولياك وفيتسەرلەرى، شەنەۋنىكتەرى مەن اسكەريلەرى جاپپاي ولتىرىلگەن ورىن. جاريالانعان مۇراعات دەرەكتەرىنە قاراعاندا ءستاليننىڭ 1940 جىلعى بۇيرىعىمەن مۇندا 21 مىڭ 857 ادام اتىلعان.

“The Qazaq Times”