فوتو: پراۆدا-تۆ

سوڭعى ۋاقىتتا ءسۇريا مەن يراكتا جەڭىلىس تاۋىپ جاتقان  «يسلام مەملەكەتى» لاڭكەستىك ۇيىمىنىڭ كەلەسى نىساناسى ورتالىق ازيا بولۋى مۇمكىن.

سوڭعى كەزدەرى باتىس بۇقارالىق اقپارات قۇرالدارى «يسلام مەملەكەتى» لاڭكەستىك ۇيىمىنىڭ اۋعانستان اۋماعىندا جاندانا باستاعاندىعى جايىندا ءجيى جازۋدا. جاقىندا رەسەيلىك باق وكىلدەرى اۋعانستاننىڭ سولتۇستىك-باتىسىندا ورنالاسقان دجاۋزدجان پروۆينتسياسىنىڭ تۇركىمەنستانمەن شەكارالاس بولىگىن «يسلام مەملەكەتى» سودىرلارى باسىپ العاندىعى جايىندا اقپارات تاراتتى. ال ماۋسىمنىڭ 15 كۇنى «يسلام مەملەكەتى» لاڭكەستىك ۇيىمى اۋعانستاننىڭ وڭتۇستىك-شىعىسىنداعى كەزىندە ۋساما بەن لادەننىڭ جاسىرىنعان تورا-بورا ۇڭگىرلەر كومپلەكسىن باسىپ العاندىعى جايىندا ايتىلعان ەدى.

جوعارىدا اتالعان اقپاراتتارعا بۇل جولى دا كوڭىل اۋدارماۋعادا بولار ەدى. ويتكەنى الەمنىڭ كەز كەلگەن بۇقارالىق اقپارات قۇرالى اۋعانستانداعى جارىلىس، تەررورلىق شابۋىل جايىندا كۇن سايىن بىرنەشە رەت اقپارات تاراتىنى بەلگىلى. بىراق بۇل جول اۋعانستان اۋماعىندا بولىپ جاتقان دۇنيەلەرگە بەيجاي قاراۋعا بولمايدى.

بىرىنشىدەن: «يسلام مەملەكەتى» لاڭكەستىك ۇيىمىنىڭ اۋعانستان جەرىندەگى سودىرلارىنىڭ سوڭعى ۋاقىتتا جاندانا باستاۋى ءسۇريا مەن يراكتاعى ءوز پوزيتسيالارىن جوعالتا باستاۋى مەن تۇسپا تۇس كەلدى. ەندى ولارعا جاڭا ۇرىس الاڭى مەن قارجى الاتىن ورتا كەرەك. ول ءۇشىن اۋعانستان تاپتىرماس مەكەن.

ەكىنشىدەن: قازىرگى تاڭدا اۋعانستان بيلىگى مەن پەنتاگون قارىم-قاتىناسى قيىنداعان. اۋعانستان ەكس-پرەزيدەنتى حاميد كارزايدىڭ ايتۋىنشا، اقش وسىنشاما ۋاقىت ارالىعىندا اۋعانستان بيلىگىنە بەرگەن بىردە-ءبىر ۋادەسىن ورىنداماعان. ونىڭ ۇستىنە پەنتاگون اسكەرى اۋعان جەرىنە كەلگەلى بەرى ەكسترەميستىك توپتار كۇشەيمەسە، السىرەمەگەن.

ۇشىنشىدەن: «يسلام مەملەكەتى» لاڭكەستىك ۇيىمىنىڭ اۋعانستاننىڭ تۇركىمەنستانمەن شەكارالاس اۋداندارىن باسىپ الۋى ولاردىڭ باتىستاعى، تاياۋ شىعىستاعى دەمەۋشىلەرىنە جاقىنداعىسى كەلەتىندىگىن جانە ورتالىق ازيادان باستاپ شىعىس ەۋروپاعا دەيىن حاليفات قۇرۋعا جاساپ جاتقان قادامدارىنىڭ ءبىرى بولۋى مۇمكىن.

سوڭعى ۋاقىتتا «يسلام مەملەكەتى» لاڭكەستىك ۇيىمىنىڭ اۋعانستاندا كۇش الا باستاعاندىعى جايىندا ۇقشۇ (ودكب) ۇيىمىدا ايتا باستادى. ۇقشۇ مالىمەتى بويىنشا، قازىرگى تاڭدا ءسۇريا مەن يراك  اۋماعىندا «يسلام مەملەكەتى» سودىرلارى قۇرامىندا سوعىسىپ جۇرگەن تمد، ونىڭ ىشىندە ورتالىق ازيا ەلدەرىنەن شىققان ازاماتتار ءوز ەلدەرىنە قايتا باستاعان. رەسمي اقپاراتتارعا سۇيەنسەك، لاڭكەستىك ۇيىمداردىڭ قۇرامىندا 7 مىڭنان استام تمد ازاماتتارى ءجۇر. ولاردىڭ 2 مىڭى الەمنىڭ كەز كەلگەن جەرىنە بارىپ سوعىسا بەرەتىن جالدامالى سودىرلار.

بۇل دەگەنىمىز ەگەردە «يسلام مەلەكەتى» ۇيىمى ءسۇريا مەن يراكتا جەڭىلىس تاۋىپ،  كەلەسى ءورت وشاعى ورتالىق ازيادا تۇتاناتىن بولسا، وندا قازاقستان، وزبەكستان، قىرعىزستان جالپى ورتالىق ازيا ەلدەرىنىڭ جاعدايى قيىندايدى دەگەن ءسوز.

“The Qazaq Times”