جاپونيانىڭ ترانسۇلتتىق كورپوراتسياسى الماتىدا جاڭا زاۋىتتىڭ قۇرىلىسىن باستادى

الماتىنىڭ الاتاۋ اۋدانىنداعى يندۋستريالدى ايماقتا Tokyo Rope Manufacturing ترانسۇلتتىق كورپوراتسياسى جەلىسى سانالاتىن  ينجەنەرلىك قاۋىپسىزدىك جۇيەلەرىن وندىرەتىن جوعارى تەحنولوگيالىق زاۋىتتىڭ قۇرىلىسى باستالدى.

وتكەن جىلدىڭ قاراشا ايىندا قر پرەزيدەنتىنىڭ قاتىسۋىمەن جاپوندىق كاسىپورىنمەن بىرلەسكەن جوعارى ساپالى مەتالل ونىمدەرىن شىعارۋعا ماماندانعان Tokyo Rope Almaty زاۋىتىنىڭ نەگىزى قالانعان بولاتىن.

ءوز سوزىندە قالا اكىمى باۋىرجان بايبەك: "الماتى  يننوۆاتسيالىق تۇرعىدا قارقىندى دامىپ كەلە جاتقان قالا رەتىندە قولايلى ينۆەستيتسيالىق كليماتقا يە. ماسەلەن، وتكەن جىلمەن سالىستىرعاندا، سىرتتان كەلەتىن ينۆەستيتسيالار كولەمى 25 پايىزعا ارتتى", -دەپ مالىمدەدى.

Tokyo Rope Manufacturing ترانسۇلتتىق كورپوراتسياسىنىڭ باسشىسى شيگەتو تاناكي: "بۇل جاپونيادان تىس ورنالاسقان ءىرى ءارى الەۋەتى زور زاۋىت بولادى. 4 گا اۋماققا ورنالاساتىن زاۋىت قۇرىلىسىنا قازىردىڭ وزىندە 3,6 ملرد تەڭگە كولەمىندە ينۆەستيتسيا تارتىلدى. تاۋ-كەن جۇمىستارىنا ارنالعان بولات جانە مەتاللدان دايىندالاتىن ءارتۇرلى ونىمدەر دايىندايتىن زاۋىتتىڭ جىلدىق قۋاتى 17 مىڭ توننا بولادى دەپ جوسپارلانىپ وتىر. شيكىزاتتىڭ باسىم بولىگىن قازاقستاننان الاتىندىقتان، بۇل ءونىم باعاسىن بىرقالىپتى ۇستاۋعا كومەكتەسەدى", -دەپ پىكىر ءبىلدىردى.

ايتا كەتۋ كەرەك، 130 جىل بۇرىن ىرگەسى قالانعان Tokyo Rope كومپانياسى ءوز سالاسىندا الەمدىك جەتەكشى كاسىپورىن سانالادى. جەر شارىنداعى ەڭ ءىرى 20 كوپىردىڭ 12-ءسىنىڭ قۇرىلىسىنا جاپوندىق كومپانيانىڭ ءونىمى قولدانىلعان.

“The Qazaq Times”