فوتو: AM 1440 KYCR.

كاتارعا ديپلوماتيالىق داعدارىس ورناتقان ءتورت ەل بىرلەسە وتىرىپ باحرەيندە اسكەري بازا قۇراتىندارىن مالىمدەدى. بۇل تۋرالى مىسىردىڭ «ءال-ەحرام ارابي» باسىلىمىنا سىلتەمە جاساي وتىرىپ، «تۇرىك تەلە-راديو» قىزمەتىنىڭ رەسمي سايتى حابارلايدى. ولار كاتاردان 72 ساعات ىشىندە وزدەرى جولداعان تالاپتى ورىنداماعان جاعدايدا ءتورت ەل بىرلەسە وتىرىپ شارالار قولداناتىندىعىن حابارلاعان.

ساۋد ارابياسى، مىسىر، بىرىككەن اراب امىرلىگى جانە باحرەين قاتارلى ەلدەر وزدەرىنىڭ 10 تارماقتان تۇراتىن تالاپتارى كاتار جاعىنان ورىندالمايتىن بولسا، وندا، كاتارعا قاراتقان ەكونوميكالىق ەمبارگونى كەڭەيتىپ، ءتىپتى سول ەلدەردەگى كاتارعا تيەسىلى مۇلىكتەردى كەپىلدىككە الاتىندارىن ەسكەرتىپ وتىر. قولداناتىن شارالارىنىڭ ءبىرى رەتىندە كاتاردى شىعاناق ىنتىماقتاستىق كەڭەسىندەگى مۇشەلىگىنەن الىپ تاستاۋى مۇمكىن.

ءتورت ەلدىڭ بىرلەسە وتىرىپ باحرەيندە اسكەري بازا قۇرۋ ىسىندە، مىسىردىڭ شىعاناق وڭىرىنە تۇڭعىش رەت اسكەري قادام جاساعالى وتىرعانى تاعى بار. كاتار داعدارىسىن شەشۋ ءۇشىن كەيبىر اراب ەلدەرىنىڭ كاتارعا قويعان تالاپتارىنىڭ ءوزى، بۇل داعدارىستىڭ شەشىم تاپپاۋىنا مۇددەلى تالاپتاردىڭ بار ەكەنىن، شىعاناق ءوڭىرىنىڭ قوجالىعى ءۇشىن كوپتەگەن تاراپتاردىڭ مۇددەلەرى تىرەسكە ءتۇسىپ جاتقانىن بايقاۋعا بولادى.

“The Qazaq Times”