تەڭگەدەگى دەپوزيتتەردىڭ پايىزدىق مولشەرلەمەسى وزگەرمەيدى

قازاقستاننىڭ دەپوزيتتەرگە كەپىلدىك قورىمەن (قدكق) بەكىتىلگەن تەڭگەدە سالىنعان دەپوزيتتەردىڭ ەڭ جوعارعى ءتيىمدى سىياقى مولشەرلەمەسى وزگەرىسسىز قالادى. بۇل تۋرالى ۇلتتىق بانك توراعاسى دانيار اقىشەۆ مالىمدەدى. قدكق بەكىتكەن جوعارعى مولشەرلەمە - 14%. 

اقىشەۆتىڭ سوزىنشە، دەپوزيت بويىنشا مولشەرلەمە قازاقستانداعى ينفلياتسيا دەڭگەيىنە، بانكتەردەگى وتىمدىلىككە، ماكروەكونوميكالىق جاعدايعا جانە بانكتەردىڭ تاۋەكەلدەرى مەن شىعىندارىنا بايلانىستى رەتتەلەدى.

ء"بىز دەپوزيتتەر بويىنشا مولشەرلەمەلەردىڭ تومەندەپ جاتقانىن باقىلاپ وتىرمىز جانە بۇل پروتسەستى قولدايمىز. بانك سەكتورىنداعى وتىمدىلىك دەڭگەيىنىڭ جاقسى بولۋىنا جانە ينفلياتسيالىق پروتسەسستەردىڭ تومەندەۋىنە بايلانىستى دەپوزيت مولشەرلەمەسى تومەندەۋى مۇمكىن. قدكق جوعارعى "شەكتى" قويدى، ءبىز ودان اسىپ كەتە المايمىز، تومەن تۇسۋگە "نيەتىمىز" بار", - دەدى ول.

سونداي-اق، ونىڭ سوزىنشە، قازىرگى ۋاقىتتا ۇلتتىق بانك ەكىنشى دەڭگەيلى بانكتەرمەن قايتارىلمايتىن دەپوزيت ماسەلەلەرىن تالقىلاپ جاتىر. ياعني سالىمشىلارعا دا، بانكتەرگە دە ءتيىمدى بولاتىنداي دەپوزيتتى ۋاقىتىنان بۇرىن شەشىپ الماۋ شارتى قاراستىرىلادى. دەپوزيتتىڭ بۇل ءتۇرىنىڭ ەرەكشەلىگى سول– جىلدىق مولشەرلەمەسى كوپ بولادى، دەگەنمەن ۋاقىتىنان بۇرىن شەشىپ الۋ مۇمكىندىگى قاراستىرىلمايدى.

«بۇل ءۇشىن زاڭنىڭ ءبىراز نورمالارىن وزگەرتۋ كەرەك. سالىمشى قانداي دەپوزيت تاڭدايتىنىن ءوزى بىلەدى. بۇل باسقا دەپوزيت تۇرلەرىنە اسەر ەتپەيدى. قايتارىلمايتىن دەپوزيتتەر بويىنشا مولشەرلەمە جوعارى ءارى سوما كەپىلدەندىرىلەدى. بۇل بويىنشا سۇراقتار تالقىلانادى", - دەدى بانكير.

“The Qazaq Times”