المازبەك اتامباەۆ جانە ۆلاديمير پۋتين. فوتو: president.kg.

قىرعىزستان پرەزيدەنتى المازبەك اتامباەۆ كەشە ماسكەۋ ساپارىنا جول الدى. بۇل تۋرالى قىرعىزستان پرەزيدەنت اپپاراتىنىڭ مەملەكەتتىك ساياسات ءبولىمى حابارلاپ وتىر.

قىرعىزستان پرەزيدەنت اپپاراتىنىڭ بەرگەن مالىمەتىندە المازبەك اتامباەۆتىڭ رەسەيگە جاسايتىن مەملەكەتتىك ساپارى 5 كۇنگە، ياعني 24 ماۋسىمعا دەيىن جالعاسادى. ەكى ەل ديپلوماتيالىق قاتىناسىنىڭ 25 جىلدىعىنا ارنالعان كەزدەسۋ رەسەي پرەزيدەنتى ۆلاديمير ءپۋتيننىڭ شاقىرۋىمەن بولىپ وتىر. بۇل رەتتە قىرعىز باسشىسى رەسەي پرەمەر-ءمينيسترى دميتري مەدۆەدەۆپەن دە كەزدەسپەك.

رەسەي مەن قىرعىزستان باسشىلارىنىڭ كەزدەسۋىنىڭ باستى تاقىرىبى - قاۋىپسىزدىك ساقتاۋ، ميگراتسيا، قارجى جانە ستاتيستيكا تارماقتارىنداعى ەكىجاقتى ىنتىماقتاستىققا قول قويۋ. كەلىسىمدەر رەسەي مەن قىرعىزستان اراسىنداعى بىرلىك جانە ستراتەگيالىق ورتاقتاستىقتى قامتىپ وتىر.

قىرعىز باسشىسى بۇعان قوسا كەزەكتى ساپارىندا رەسەيدەگى قىرعىزستان مادەنيەت اپتالىعىنا قاتىسىپ، كرەملدىڭ ۇلكەن زالىنداعى قىرعىز ونەرپازدارىنىڭ كونتسەرتىن رەسەي باسشىلارىمەن بىرگە تاماشالايدى.

“The Qazaq Times”