تۇركيا پرەزيدەنتى رەجەپ تايىپ ەردوعان رەسەيگە مەملەكەتتىك ساپارمەن بارماق. كرەمل تۇرىك باسشىسىن كۇتىپ الۋ دايىندىعىندا ەكەنىن ءپۋتيننىڭ ءباسپاسوز حاتشىسى دميتري پەسكوۆ مالىمدەدى.

كرەمل وكىلىنىڭ ايتۋىنشا تۇركيا پرەزيدەنتىنىڭ كەزەكتى رەسەي ساپارى ەكى ەل اراسىندا ديپلوماتيالىق قاتىناس ورناتقاننان بەرگى ەڭ اۋقىمدى مەملەكەتتىك ساپار بولعالى وتىر. ەردوعانمەن بىرگە تۇرىك ۇكىمەتىنىڭ بىرقاتار جوعارى جەتەكشىلەرى دە رەسەيلىك ارىپتەستەرىمەن كەڭەيتىلگەن وتىرىسقا قاتىسادى.

الدىن الا بەرىلگەن مالىمەتكە قاراعاندا تاراپتار بۇل جولى ايماقتىڭ جانە جاھاندىق قاۋىپسىزدىك پەن تۇراقتىلىق ماسەلەسىنەن تارتىپ، ەنەرگەتيكا، ساۋدا-ەكونوميكا سالالارىنداعى ىنتىماقتاستىق تۋرالى كەڭىنەن تالقىلايدى. پۋتين مەن ەردوعان اراسىنداعى كەزدەسۋدە قازىرگى وزەكتى گەوساياسي ماسەلەلەردە قامتىلاتىنىن مالىمدەگەن.

تۇرىك جانە ورىس باسشىلارى اراسىنداعى كەزدەسۋدە ءسۇريا مەن اۋعانستان ماسەلەسى دە ماڭىزدى كۇن تارتىپكە قويىلارى ءسوزسسىز. سەبەبى، ءسۇريادا رەسەي كۇشىنە سۇيەنگەن باشار اساد رەجيمى تۇركيا ىقپالىنداعى يدليبگە اۋە شابۋىلدارىن كۇشەيتۋدە.

ال، اۋعانستاندا تۇركيانىڭ اسكەري كۇشتەرى كابۋل اۋەجايىن كۇزەتىپ تۇر، سايكەسىنشە اۋعان جەرىندەگى ماڭىزدى قاتىسۋشىلاردىڭ ءبىرى رەتىندە ورتالىق ازياعا دا وزىندىك ىقپالى ارتا تۇسۋدە. بۇل باعىتتا رەسەي ءوزى ىقپال ەتىپ وتىرعان ورتا ازياداعى جاڭا ويىنشىمەن كەيبىر ماسەلەلەردى تالقىلاۋىنا تۋرا كەلەدى. دەمەك، تۇرىك باسشىسىنىڭ كەزەكتى ساپارى ورتا ازيا ەلدەرىنىڭ دە نازارىندا بولادى.

The Qazaq Times