نيۋ-يورك مۇسىلمان پوليتسياسى. فوتو: تۇرىك تەلە راديو.

اقش-تىڭ نيۋ-يورك قالاسىنداعى مۇسىلمان پوليتسەيلەر اۋىزاشاردا باس قوستى. نيۋ-يورك پوليتسيا قىزمەتىندە ىستەيتىن كوپشىلىگى تۇرك تەكتى مۇسىلمان پوليتسەيلەر تاياۋ-شىعىس جانە تۇرىك ۇيىمى مەشىتىنىڭ ۇيىمداستىرۋىمەن باس قوسىپ اۋىزاشار جاسادى. بۇل تۋرالى «تۇرىك تەلە-راديو» قىزمەتىنىڭ رەسمي سايتى حابارلاپ وتىر.

اۋىزاشارعا نيۋ-يورك قالاسى پوليتسياسىنىڭ بىرقاتار لاۋازىمدى باسشىلارى دا كەلىپ قاتىستى. سونىمەن بىرگە قالالىق حالىق ءماجىلىسىنىڭ ءتورايىمى مەليسسا مارك-ۆيۆەريتو دا كەلگەن. ول سوزىندە اتالعان قالادا 900 مۇسىلمان پوليتسيا قىزمەتكەرىنىڭ بار ەكەنىن اتاپ ءوتتى. ول جانە: «قالاداعى بۇل كوپتۇرلىلىك مەنىڭ ەڭ زور ماقتانىشىم»، – دەگەن پىكىرىن ءبىلدىردى.

ۇيىمداستىرۋشىلار جاعى بۇل شارانىڭ بيىل ەكىنشى رەت وتكىزىلىپ وتىرعانىن، بولاشاقتا ۇزبەي جالعاستىرىپ تۇراتىنىن ايتىپ ءوتتى. ءبىر نيۋ-يورك قالاسىندا عانا ەمەس، قۇراما شتاتتىڭ جەر-جەرىندەگى ءتۇرلى سالادا قىزمەت ەتەتىن مۇسىلماندار رامازان ايىندا اۋىزاشاردا باس قوسۋ شارالارىن ۇيىمداستىرىپ كەلەدى.

“The Qazaq Times”