فوتو: odessa.all.biz

پارلامەنت ءماجىلىسىنىڭ دەپۋتاتتارى "قازاقستان رەسپۋبليكاسى مەن قىرعىز رەسپۋبليكاسى اراسىنداعى تاريفتىك ساياسات نەگىزدەرىن قوسا العاندا، تەمىرجول كولىگى كورسەتەتىن قىزمەتتەرگە قول جەتكىزۋدى رەتتەۋ ءتارتىبىن قولدانۋ تۋرالى كەلىسىمدى راتيفيكاتسيالاۋ" زاڭ جوباسىن ماقۇلدادى.

زاڭ جوباسىن ۇسىنعان قر ينۆەستيتسيالار جانە دامۋ ءمينيسترى جەڭىس قاسىمبەكتىڭ سوزىنشە، قول قويىلعان كەلىسىم 2017 جىلدىڭ 10 قاڭتارىنان بەرى ۋاقىتشا قولدانىلىپ كەلەدى جانە ەكى ەل اراسىنداعى  ەاەو-عا قاتىستى كەيبىر كەلىسىم نورمالارىن مەرزىمىنەن بۇرىن قابىلداۋدى قاجەت ەتەدى.

ءمينيستردىڭ سوزىنشە، كەلىسىم بىرىنشىدەن، قازاق جانە قىرعىز تۇتىنۋشىلارى ءۇشىن تەمىرجول كولىگى قىزمەتتەرى مەن ينفراقۇرىلىمنىڭ قولجەتىمدى بولۋىن قامتاماسىز ەتەدى. ەكىنشىدەن، ەاەو شەڭبەرىندە قازاقستان مەن قىرعىزستان اراسىندا تەمىر جول جانە ترانزيت كولىگىمەن تاسىمالداناتىن تاۋارلارعا قاتىستى بىرىڭعاي تاريفتەردى تاراپتاردىڭ پايدالانۋىنا مۇمكىندىك بەرەدى.

ء"بىرىنشى كەزەكتە بىرىڭعاي ءتاريفتى قولدانۋ قولايلى تاريفتىك جاعداي جاساۋ ارقىلى تاسىمال كولەمىنىڭ ارتۋىن قامتاماسىز ەتەدى. قازىردىڭ وزىندە ەكى ەل اراسىنداعى جۇك تاسىمالى وتكەن جىلدىڭ وسى كەزەڭىمەن سالىستىرعاندا 14%-عا ارتتى", — دەيدى مينيستر.

ايتا كەتەيىك، ەكى ەل اراسىنداعى تاريفتىك ساياسات نەگىزدەرىن قوسا العاندا، تەمىرجول كولىگى كورسەتەتىن قىزمەتتەرگە قول جەتكىزۋدى رەتتەۋ ءتارتىبىن قولدانۋ تۋرالى كەلىسىم 2016 جىلدىڭ 26 جەلتوقسانىندا سانكت-پەتەربۋرگتە جاسالعان.

“The Qazaq Times”