فوتو: energo.gov.kz

استانادا قر ەنەرگەتيكا ءمينيسترى قانات بوزىمباەۆ پەن ساۋد ارابياسى كورولدىگىنىڭ ەنەرگەتيكا ونەركاسىپ جانە مينەرالدى رەسۋرستار ءمينيسترى حاليد ابدۋلازيز ال فاليحپەن اراسىندا كەزدەسۋ ءوتتى، دەپ حابارلايدى مينيسترلىكتىڭ ءباسپاسوز قىزمەتى.

ءباسپاسوز قىزمەتىنىڭ مالىمەتىنشە، كەزدەسۋ قازاقستان جانە ساۋد ارابياسى مەملەكەت باسشىلارى اراسىنداعى ەر-ريادتا 2016 جىلدىڭ 24-25 قازانىنداعى قول جەتكىزىلگەن ۋاعدالاستىقتار اياسىندا بولعان.

"كەزدەسۋ بارىسىندا «بىرىككەن حيميالىق كومپانيا» جشس جانە «SABIC» كومپانيالارى اراسىندا ەكى جاقتى ىنتىماقتاستىق تۋرالى مەموراندۋمعا قول قويىلدى", - دەلىنگەن ءباسپاسوز حابارلاماسىندا.

كورسەتىلگەن قۇجات قازاقستانداعى پوليەتيلەن، پوليپروپيلەن جانە مەتانول ءوندىرۋ بويىنشا جوبالاردىڭ ىسكە اسىرىلۋ مۇمكىندىكتەرىن زەردەلەۋدە نەگىز قالاۋشى بولىپ تابىلادى. مەموراندۋمعا «بىرىككەن حيميالىق كومپانيا» جشس-نىڭ باسقارما توراعاسى جەڭىس وسەرباي جانە «SABIC» كومپانياسىنىڭ باس ديرەكتورى يۋسەف ال-بەنيان قول قويدى.

"مەموراندۋمعا قول قويۋ مۇناي-گاز سالاسىنداعى ىنتىماقتاستىقتى نىعايتۋدىڭ جاقسى ۇلگىسى بولىپ تابىلادى. «SABIC» كومپانياسىنىڭ تاجىريبەسى الەمدىك ءۇردىستى ەسكەرە وتىرىپ، مۇناي-حيميا جوبالارىن ىسكە اسىرۋدىڭ ءتيىمدى مودەلىن دايىنداۋعا كومەكتەسەتىندىگىنە سەنىم مول", - دەيدى قازاقستان رەسپۋبليكاسى ەنەرگەتيكا ءمينيسترى ق. بوزىمباەۆ .

كورسەتىلگەن جوبالاردى اتىراۋ وبلىسىنداعى مۇناي-حيميا ايماعىندا ىسكە اسىرۋ جوسپارلانۋدا. وسى اۋماقتا سالىقتىق، كەدەن جانە باسقا دا جەڭىلدىكتەر كوزدەيتىن ارنايى قۇقىقتىق رەجيم قاراستىرىلعان.

ايتا كەتەيىك، "SABIC" (Saudi Basic Industries Corporation) – حيميا جانە مەتاللۋرگيا ونەركاسىبىندە مامانداندىرىلعان جاريا اكتسيونەرلىك كومپانياسى. الەمنىڭ ءىرى مۇناي-حيميا كومپانيالارىنىڭ بەستىگىنە كىرەدى.

“The Qazaq Times”