فوتو: astana-akshamy.kz

قر پرەمەر-ءمينيسترى باقىتجان ساعىنتاەۆ جاڭا فورماتتاعى اتاۋلى الەۋمەتتىك كومەكتى ەنگىزۋ ماسەلەلەرى قارالعان ۇكىمەت وتىرىسىندا ءونىمدى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسىنا ەڭبەككە قابىلەتتى حالىقتى بەلسەندى تۇردە تارتۋدى تاپسىردى دەپ حابارلاندى قازاقستان رەسپۋبليكاسىنىڭ پرەمەر-ءمينيسترىءنىڭ  رەسمي سايتىندا.

باقىتجان ساعىنتاەۆ حالىق اراسىندا ءتۇسىندىرۋ جۇمىسىن كەڭىنەن جۇرگىزۋدى تاپسىردى. بارلىق دەڭگەيدەگى اكىمدەرگە جاڭا فورماتتاعى اتاۋلى الەۋمەتتىك كومەك كورسەتۋ شارتتارىنا جاتاتىن وتباسىلار ساناتىن انىقتاۋ جۇكتەلدى.

2017 جىلدىڭ سوڭىنا دەيىن ءاربىر از قامتىلعان وتباسىمەن ولاردىڭ ەڭبەككە قابىلەتتى مۇشەلەرىن وقىتۋ، ەڭبەكپەن قامتۋ، ءوز كاسىبىن اشۋ بويىنشا جەكە جوسپارلار جاساۋعا دەيىن جۇمىسپەن قامتۋ ماسەلەسىن پىسىقتاۋ قاجەت. بۇل جۇمىستى ساپالى جۇرگىزۋ ءۇشىن باقىتجان ساعىنتاەۆ قر ەڭبەك جانە حالىقتى الەۋمەتتىك قورعاۋ مينيسترلىگىنە جەرگىلىكتى اتقارۋشى ورگاندار جانە جۇمىسپەن قامتۋ ورتالىقتارىنىڭ قىزمەتكەرلەرىن دايارلاۋدى قامتاماسىز ەتۋدى تاپسىردى.

ۇكىمەتتىڭ الەۋمەتتىك كومەك فورماتىن وزگەرتۋ بويىنشا جۇمىسى مەملەكەت باسشىسىنىڭ «بەس ينستيتۋتسيونالدىق رەفورمالاردى جۇزەگە اسىرۋ بويىنشا 100 ناقتى قادام» ۇلت جوسپارىنىڭ مىندەتتەرىنە سايكەس جۇرگىزىلىپ جاتىر. 84 قادامدا الەۋمەتتىك كومەكتى وعان شىن مانىندە مۇقتاج ازاماتتار ءۇشىن عانا ونىڭ اتاۋلى سيپاتىن كۇشەيتۋ ارقىلى وڭتايلاندىرۋ تۋرالى ايتىلعان.

سونىمەن قاتار، ارنايى ەكونوميكالىق جانە يندۋستريالىق ايماقتاردىڭ تيىمدىلىگى باسقارۋشى كومپانيالاردىڭ قىزمەتىنە تىكەلەي تاۋەلدى ەكەنىن ەسكەرە وتىرىپ، باقىتجان ساعىنتاەۆ جاۋاپتى مەملەكەتتىك ورگاندارعا وسىنداي ۇيىمداردى تاڭداۋ كەزىندە مۇقيات قاراپ، ولاردىڭ جۇمىستارىن ءتيىمدى باقىلاۋدى تاپسىردى.

“The Qazaq Times”