ەلىمىزدە ەكىنشى مارتە ەنگىزىلگەن قاتاڭ كارانتين كەزىندە تابىسىنان ايرىلعان ايرىلعان ازاماتتارعا جاردەماقىعا 17 شىلدەدەن باستاپ ءوتىنىش قالدىرۋعا بولادى.

وسىعان دەيىن ەنگىزگەن 14 كۇندىك شەكتەۋ شارالارى ەندى 2 تامىزعا دەيىن ۇزارتىلدى. وسىعان بايلانىستى ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ءبىر رەت 42 500 تەڭگە بەرىلەتىنىن مالىمدەدى.

ورتالىق كوممۋنيكاتسيالار قىزمەتىندەگى بريفينگتە ءمينيستردىڭ ايتۋىنشا، الداعى ەكى كۇندە الەۋمەتتىك جاردەماقىنى تولەۋدىڭ مەحانيزمدەرى دايىندالادى. ءبارى ويداعىداي بولسا، 16 شىلدە كۇنى تاعايىنداۋ ەرەجەسى جاريالانادى. 17 شىلدەدەن باستاپ وتىنىشتەر قابىلدانىپ، 20 شىلدەدەن باستاپ قۇجاتتار قارالادى. بۇل جولى جاردەماقى الۋ ءۇشىن الەۋمەتتىك تولەم تولەۋ مىندەتتى ەمەس.
سونداي-اق نۇرىمبەتوۆ: «42500 تەڭگە توتەنشە جاعداي كەزىندەگى ەرەجە بويىنشا تابىسىنان ايىرىلعان ازاماتتارعا، ونىڭ ىشىندە، جالدامالى قىزمەتكەرلەر مەن ءوزىن-ءوزى جۇمىسپەن قامتىعان ازاماتتارعا بەرىلەدى» دەدى.

ەستەرىڭىزگە سالا كەتسەك، بۇعان دەيىن ۆيتسە-پرەمەر ەرالى توعجانوۆ اتاۋلى جاردەم اقى تولەنبەيتىنىن ەسكەرتىپ، ونىڭ سەبەبىن بىلاي تۇسىندىرگەن بولاتىن: «42500 تەڭگە توتەنشە جاعداي رەجيمىنە بايلانىستى تولەندى. توتەنشە جاعداي رەجيمى توقتاتىلدى، ەندى ونى تولەۋگە ەشقانداي نەگىز جوق».

وسىلايشا، 5 شىلدەدەن باستاپ ەكى اپتاعا كارانتين جاريالانعان ەدى. الايدا، ەلدەگى جاعدايعا بايلانىستى كارانتين مەرزىمى 2 تامىزعا دەيىن ۇزارتىلدى. كارانتيننىڭ ۇزارتىلعانىن جاريالاعان پرەمەر-مينيستر اسقار مامين توتەنشە جاعداي جاريالانباسا دا، شەكتەۋگە بايلانىستى قىزمەتى شەكتەلگەن ازاماتتارعا 42 500 تەڭگە كولەمىندەگى قاراجات بەرىلەدى دەپ، ۆيتسە-پرەمەر توعجانوۆتىڭ ءسوزىن جوققا شىعاردى.

"The Qazaq Times"