اقش-تىڭ يزرايلدەگى ەلشىلىگى. فوتو: The Times of Israel.

اقش پرەزيدەنتى دونالد ترامپ تاققا وتىرعاننان كەيىن ءبىر قاتار وزگەرىستەر جاساۋ شەشىمدەرىن جاساعان. سونىڭ ىشىندە ءيزرايلدىڭ تەل-اۆيۆ قالاسىنداعى قۇراما شتاتتىڭ وكىلەتتى ەلشىلىگىن يەرۋساليمگە كوشىرۋ ءىسى دە بار بولاتىن. بۇل ترامپ قانا ەمەس امەريكا مەن ەۋروپا جانە ورتا-شىعىس ءۇشىن اسا نازىك ماسەلەنىڭ ءبىرى. ەلشىلىكتى يەرۋساليم قالاسىنا ورنالاستىرۋ، يەرۋساليمدى ءيزرايلدىڭ ورتالىق قالاسى دەپ مويىنداۋ بولىپ سانالادى. ال بۇعان تۇتاس اراب الەمى قارسى تۇرۋى مۇمكىن.

"تۇرىك تەلە-راديو" قىزمەتىنىڭ رەسمي سايتى جاريالاعان ءبىر حاباردا، ەۋروپالىق وداقتىڭ دا ترامپ جاساعان شەشىمگە كەلىسە بەرمەيتىنىن ايتتى. وڭىرلىك تۇراقتىلىقتى ساقتاپ تۇرۋ ءۇشىن بۇل شەشىمنەن باس تارتقانى دۇرىس دەپ سانايدى.  ەو-نىڭ سىرتقى ىستەر جانە قاۋىپسىزدىك جونىندەگى جوعارى وكىلى فەدەريكا موگەريني بۇل تۋرالى: "الەم تۇراقتىلىعى مەن ورنىقتىلىعى ءۇشىن، اسىرەسە ورتا-شىعىس ماسەلەسىنىڭ وڭعا باسۋى ءۇشىن بارىنشا سابىرلى شەشىمدەردى جاساۋعا ءتيىسپىز. ءبىر تاراپتى شەشىمدەردەن، سونىڭ ىشىندە الەم حالىقتارىنىڭ پىكىرىنە بۇتىندەي اسەر ەتەتىن شەشىمدەردە اسا بايىپتىلىق تانىتۋىمىز كەرەك", – دەدى.

ترامپ بيلىگى 1995 جىلعى "وكىلەتتى ەلشىلىكتەر زاڭى" نەگىزىندە يزرايلدەگى ەلشىلىگىن يەرۋساليمگە كوشىرۋدى كوزدەپ وتىر. سەبەبى، اقش-تىڭ بۇل زاڭىندا وكىلەتتى ەلشىلىك سول ەلدىڭ اكىمشىلىك، ساياسي ورتالىعىندا بولۋى ءتيىس.  اتالعان زاڭ قابىلدانعاننان بەرى اقش-تىڭ بىردە ءبىر پرەزيدەنتى تالاستاعى قالا يەرۋساليمدى يزرايل استاناسى دەپ مويىنداپ، وعان ەلشىلىك كوشىرمەگەن بولاتىن. بىراق 1967 جىلى يزرايل جاعىنان جاۋلاپ الىنعان يەرۋساليم حالىقارالىق قۇقىقتار قورعاۋ ۇيىمى جاعىنان ەش ەلدىڭ مەنشىگى بولىپ سانالمايدى. يسلام ءدىنىنىڭ قاسيەتتى قۇندىلىقتارىنىڭ ءبىرى ءال-اكسا مەشىتى ورنالاسقان شىعىس-يەرۋساليمدى يوردانيا مەن مىسىر ەلى ءوز باقىلاۋىنا الىپ وتىر.

“The Qazaq Times”